Prezident Shavkat Mirziyoyev Navro‘z bayrami arafasida “Jazo muddatini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida”gi farmonni imzoladi.
Farmonga muvofiq, jazo muddatini o‘tayotgan hamda qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan 140 nafar fuqaro afv etildi. Ularning 4 nafari asosiy jazodan to‘liq ozod etildi, 69 nafari jazoni o‘tashdan muddatidan ilgari shartli ozod qilindi.
Shuningdek, 8 nafar fuqaroga tayinlangan ozodlikdan mahrum etish jazosi yengilroq jazo bilan almashtirildi. 59 nafar shaxsga tayinlangan ozodlikdan mahrum etish jazosining muddatlari qisqartirildi.
Afv etilganlarning 12 nafarini chet el fuqarolari, 9 nafarini 60 yoshdan oshgan shaxslar, 13 nafarini ayollar hamda 14 nafarini taqiqlangan tashkilotlar faoliyatida qatnashgan shaxslar tashkil etadi.
Farmon ijrosi yuzasidan afv etilgan shaxslarni oilasi va yaqinlari bag‘riga qaytarish, ijtimoiy hayotga moslashib, foydali mehnat bilan shug‘ullanishlari, sog‘lom turmush tarzini yo‘lga qo‘yib, jamiyatda munosib o‘rin topishlari uchun ularga ko‘mak berish bo‘yicha mas’ul vazirlik va idoralarga tegishli topshiriqlar berilgan.
Avvalroq 8-mart bayrami arafasida O‘zbekistonda 14 mahkuma ozodlikka chiqarilgani, yana 2 ayolning jazosi yengillashtirilgani haqida xabar berilgan edi.
Izoh (0)