Toshkent viloyati tog‘lari, xususan, Chimyon tog‘ havzasida 2021-yilda oxirgi 40 yillikda eng ko‘p hajmda qor ko‘chkilari kuzatilgan to‘rtinchi qish mavsumi bo‘lgan. Bu haqda Chimyon qor ko‘chki stansiyasi mutaxassisi Albert Popov o‘zining Facebook’dagi sahifasi orqali ma’lum qildi.
Popovning yozishicha, 2021-yil fevral oyidagi keskin isish va keskin sovish kabi iqlim anomaliyalari ortidan Chimyon tog‘liklarida juda ko‘p miqdorda bir nechta qor ko‘chkilari sodir bo‘lgan. Ko‘chkilarning umumiy hajmi 1 million metr kubdan ziyod.
Mavsum davomida kuzatilgan qor ko‘chkilarining umumiy hajmi ko‘p yillik o‘rtacha me’yordan 1,8 martaga ko‘p qayd etilgan.
“Barchasiga noyabr oyida sodir bo‘lgan sovuq aybdor. Oldinda bahorning yana 1,5 oyi turibdi va, albatta, ko‘chkilarning umumiy hajmi yana ortadi”, — deb yozadi mutaxassis.
Qor ko‘chkilari natijasida hozircha qancha zararlanish bo‘lganligi aytilmagan.
Avvalroq Bo‘stonliqdagi “Amirsoy” tog‘-chang‘i kurorti 12-martagacha yopilishi to‘g‘risida xabar berilgandi. Bunga yo‘l qatnov qismida ko‘chkining oldini olish maqsadida kurortga olib boradigan kirish yo‘lida ta’mirlash ishlari sabab bo‘lgan.
Izoh (0)