Finlyandiya Markaziy jinoiy politsiyasi (SUPO) APT31 xakerlar jamoasini 2020-yilgi kiberjosuslik va parlamentning ma’lumotlar bazasiga hujum qilishda aybladi. Bu haqda “RIA Novosti” xabar berdi.
Checkpoint va FireEye internet xavfsizligi kompaniyalari ma’lumotlariga asoslanib Helsingin Sanomat gazetasining xabar berishicha, bu xakerlar guruhi “Xitoy hukumatining kiber operatsiyalari bilan bog‘liq”.
“SUPO 2020-yilda parlamentga qarshi uning IT-tizimiga kirish maqsadida amalga oshirilgan kiberhujum haqida ma’lumot berdi. SUPO razvedkasi ma’lumotlariga ko‘ra, APT31 xakerlar jamoasi bu kiberhujum uchun javobgar hisoblanadi”, — deyiladi xabarda.
Politsiya parlamentga keyingi xakerlik hujumlarini bartaraf etish uchun ma’lumotlar berdi. Parlamentni ogohlantirishdan tashqari, SUPO Finlyandiyaning Milliy kiberxavfsizlik markaziga (NCSC-FI) ham ma’lumot yubordi va Milliy tergov byurosini xabardor qildi.
Finlyandiya parlamenti spikeri Anu Vexvilaynen kiberhujum “fin demokratiyasi va jamiyati”ga qarshi qaratilganini ta’kidladi.
Shuningdek, xitoylik xakerlar Qo‘shma Shtatlardagi turli tashkilotlardan ma’lumot olish maqsadida Microsoft Exchange Server pochtalarining mahalliy versiyalariga hujum qildi.
Avvalroq xakerlar bir nechta mamlakatdagi shifoxonalar, politsiya uchastkalari va ba’zi kompaniyalarga o‘rnatilgan 150 mingdan ortiq kuzatuv kameralariga hujum qilib, ulardan foydalanish imkoniyatini qo‘lga kiritgani haqida xabar berildi. Hujum Verkada kompaniyasi tomonidan ishlab chiqarilgan videokuzatuv kameralariga uyushtirildi, ular foydalanuvchilar tomonidan internet orqali boshqarilishi mumkin.
Izoh (0)