Финляндия Марказий жиноий полицияси (SUPO) APT31 хакерлар жамоасини 2020 йилги кибержосуслик ва парламентнинг маълумотлар базасига ҳужум қилишда айблади. Бу ҳақда «РИА Новости» хабар берди.
Checkpoint ва FireEye интернет хавфсизлиги компаниялари маълумотларига асосланиб Helsingin Sanomat газетасининг хабар беришича, бу хакерлар гуруҳи «Хитой ҳукуматининг кибер операциялари билан боғлиқ».
«SUPO 2020 йилда парламентга қарши унинг IT-тизимига кириш мақсадида амалга оширилган киберҳужум ҳақида маълумот берди. SUPO разведкаси маълумотларига кўра, APT31 хакерлар жамоаси бу киберҳужум учун жавобгар ҳисобланади», — дейилади хабарда.
Полиция парламентга кейинги хакерлик ҳужумларини бартараф этиш учун маълумотлар берди. Парламентни огоҳлантиришдан ташқари, SUPO Финляндиянинг Миллий киберхавфсизлик марказига (NCSC-FI) ҳам маълумот юборди ва Миллий тергов бюросини хабардор қилди.
Финляндия парламенти спикери Ану Вехвилайнен киберҳужум «фин демократияси ва жамияти»га қарши қаратилганини таъкидлади.
Шунингдек, хитойлик хакерлар Қўшма Штатлардаги турли ташкилотлардан маълумот олиш мақсадида Microsoft Exchange Server почталарининг маҳаллий версияларига ҳужум қилди.
Аввалроқ хакерлар бир нечта мамлакатдаги шифохоналар, полиция участкалари ва баъзи компанияларга ўрнатилган 150 мингдан ортиқ кузатув камераларига ҳужум қилиб, улардан фойдаланиш имкониятини қўлга киритгани ҳақида хабар берилди. Ҳужум Verkada компанияси томонидан ишлаб чиқарилган видеокузатув камераларига уюштирилди, улар фойдаланувчилар томонидан интернет орқали бошқарилиши мумкин.
Изоҳ (0)