Jentlmenlar klubi: faoliyati davomida umuman qizil kartochka olmagan taniqli futbolchilar

Futbol ehtiroslarga boy o‘yin bo‘lib, o‘yinchilar ba’zan o‘zi xohlab, ba’zida esa istamagan holda raqibiga zarar yetkazib qo‘yadi. Buning uchun ular hakamlar tomonidan qizil kartochkalar bilan jazolanadi. Ammo futbol tarixida yana shunday o‘yinchilar ham borki, ular faoliyati mobaynida birorta marta ham qizil rangdagi kartochkaga loyiq ko‘rilmagan. “Daryo” quyida butun faoliyatida umuman qizil kartochka olmagan taniqli futbolchilar haqida material tayyorladi.

Raul

Biror marta ham o‘yindan chetlatilmagan futbolchilar haqida gap ketganida, ko‘pchilik birinchi bo‘lib, Raulni esga oladi. Darhaqiqat, “Real” va Ispaniya terma jamoasining afsonasi Madrid klubidagi 16 yillik faoliyati hamda “Shalke-04”, “As-Sadd” kabi jamoalardagi o‘yinlarida umuman qo‘pol harakat qilmagan. Birorta ham qizil kartochka “ishlab olmagan” Raul o‘yinchi sifatida 1018 o‘yin o‘tkazib, 428 ta gol urgan va umumiy hisobda 21 ta sovrin qo‘lga kiritgan. U ayni damda “Kastilya” (“Real”ning ikkinchi tarkibi) jamoasiga bosh murabbiylik qilmoqda.

Xavi

Xavi zamonaviy ispan futbolining haqiqiy afsonasi hisoblanadi. U o‘zining to‘pni mohirona boshqara olish qobiliyati va zargarona uzatmalari bilan dunyoning eng yaxshi pleymekeri nomiga loyiq ko‘rilgan. Aynan uning davrida Xosep Gvardiola tiki-taka uslubini o‘z cho‘qqisiga chiqargandi. Futbolchi sifatida 33 ta sovringa ega chiqqan Xavi umumiy hisobda 990 o‘yin o‘tkazib, 121 ta gol urgan va 236 ta assistni amalga oshirgan. Xavi hozirda Qatarning “As-Sadd” klubida murabbiylik qilmoqda.

Andres Inyesta

2002—2018-yillar davomida “Barselona”da to‘p surib, uning haqiqiy afsonasiga aylangan Inyesta maydonda shunday nafis harakatlarni amalga oshirardiki, bamisoli qalam tutgan shoirni eslatib yuborardi. Hozirda Yaponiyaning “Vissel Kobe”si sharafini himoya qilayotgan futbolchining maydondagi qo‘pol harakatlariga hech kim guvoh bo‘lmagan bo‘lsa kerak. Umumiy hisobda 39 ta sovrin yutgan Andres Inyestaning hisobida 880 o‘yin, 86 ta gol va 186 ta golli uzatma bor.

Filipp Lam

Odatda Filipp Lamning pozitsiyasida (himoyada) o‘ynaydigan futbolchilar raqiblarni to‘xtatish uchun qo‘pollik qilishga majbur bo‘ladi, tabiiyki, bu vaziyatlar kartochkalarsiz o‘tmaydi. Ammo Filipp Lam faoliyatida biror marta ham qizil kartochkalarga duch kelmagan va har doim yosh futbolchilarga namuna bo‘lib kelgan. 2017-yilda faoliyatini yakunlagan futbolchi 765 o‘yin o‘tkazgan va 27 ta gol urgan. Uning sovrinlari soni esa 22 tani tashkil qiladi.

Karim Benzema

“Real” hujumchisi Karim Benzema ko‘p marotaba maydon tashqarisidagi mojarolarga aralashgan, aynan ushbu janjallarning biri tufayli u Fransiya terma jamoasidan ham chetlatilgandi (2015-yilda Matyo Valbuena bilan bo‘lgan mojaro).

Ammo yashil maydonda Benzema umuman boshqa odamga aylanadi. 2004-yilda professional faoliyatini boshlagan Karim ortda qolgan yillar mobaynida biror marta hakam tomonidan chetlatilmagan. 771 ta o‘yin o‘tkazgan futbolchi 360 ta gol urgan va 28 ta sovrin qo‘lga kiritgan. Benzemaning hali faoliyatini yakunlamaganini hisobga olib, aytish mumkinki, hali unda qizil kartochka “ishlab olish” imkoniyati bor.

Boshqa maqolalar: