Жентлменлар клуби: фаолияти давомида умуман қизил карточка олмаган таниқли футболчилар

Футбол эҳтиросларга бой ўйин бўлиб, ўйинчилар баъзан ўзи хоҳлаб, баъзида эса истамаган ҳолда рақибига зарар етказиб қўяди. Бунинг учун улар ҳакамлар томонидан қизил карточкалар билан жазоланади. Аммо футбол тарихида яна шундай ўйинчилар ҳам борки, улар фаолияти мобайнида бирорта марта ҳам қизил рангдаги карточкага лойиқ кўрилмаган. «Дарё» қуйида бутун фаолиятида умуман қизил карточка олмаган таниқли футболчилар ҳақида материал тайёрлади.

Рауль

Бирор марта ҳам ўйиндан четлатилмаган футболчилар ҳақида гап кетганида, кўпчилик биринчи бўлиб, Раулни эсга олади. Дарҳақиқат, «Реал» ва Испания терма жамоасининг афсонаси Мадрид клубидаги 16 йиллик фаолияти ҳамда «Шальке-04», «Ас-Садд» каби жамоалардаги ўйинларида умуман қўпол ҳаракат қилмаган. Бирорта ҳам қизил карточка «ишлаб олмаган» Рауль ўйинчи сифатида 1018 ўйин ўтказиб, 428 та гол урган ва умумий ҳисобда 21 та соврин қўлга киритган. У айни дамда «Кастиля» («Реал»нинг иккинчи таркиби) жамоасига бош мураббийлик қилмоқда.

Хави

Хави замонавий испан футболининг ҳақиқий афсонаси ҳисобланади. У ўзининг тўпни моҳирона бошқара олиш қобилияти ва заргарона узатмалари билан дунёнинг энг яхши плеймекери номига лойиқ кўрилган. Айнан унинг даврида Хосеп Гвардиола тики-така услубини ўз чўққисига чиқарганди. Футболчи сифатида 33 та совринга эга чиққан Хави умумий ҳисобда 990 ўйин ўтказиб, 121 та гол урган ва 236 та ассистни амалга оширган. Хави ҳозирда Қатарнинг «Ас-Садд» клубида мураббийлик қилмоқда.

Андрес Иньеста

2002—2018 йиллар давомида «Барселона»да тўп суриб, унинг ҳақиқий афсонасига айланган Иньеста майдонда шундай нафис ҳаракатларни амалга оширардики, бамисоли қалам тутган шоирни эслатиб юборарди. Ҳозирда Япониянинг «Виссел Кобе»си шарафини ҳимоя қилаётган футболчининг майдондаги қўпол ҳаракатларига ҳеч ким гувоҳ бўлмаган бўлса керак. Умумий ҳисобда 39 та соврин ютган Андрес Иньестанинг ҳисобида 880 ўйин, 86 та гол ва 186 та голли узатма бор.

Филипп Лам

Одатда Филипп Ламнинг позициясида (ҳимояда) ўйнайдиган футболчилар рақибларни тўхтатиш учун қўполлик қилишга мажбур бўлади, табиийки, бу вазиятлар карточкаларсиз ўтмайди. Аммо Филипп Лам фаолиятида бирор марта ҳам қизил карточкаларга дуч келмаган ва ҳар доим ёш футболчиларга намуна бўлиб келган. 2017 йилда фаолиятини якунлаган футболчи 765 ўйин ўтказган ва 27 та гол урган. Унинг совринлари сони эса 22 тани ташкил қилади.

Карим Бензема

«Реал» ҳужумчиси Карим Бензема кўп маротаба майдон ташқарисидаги можароларга аралашган, айнан ушбу жанжалларнинг бири туфайли у Франция терма жамоасидан ҳам четлатилганди (2015 йилда Матё Вальбуэна билан бўлган можаро).

Аммо яшил майдонда Бензема умуман бошқа одамга айланади. 2004 йилда профессионал фаолиятини бошлаган Карим ортда қолган йиллар мобайнида бирор марта ҳакам томонидан четлатилмаган. 771 та ўйин ўтказган футболчи 360 та гол урган ва 28 та соврин қўлга киритган. Бенземанинг ҳали фаолиятини якунламаганини ҳисобга олиб, айтиш мумкинки, ҳали унда қизил карточка «ишлаб олиш» имконияти бор.

Бошқа мақолалар: