Aytishlaricha, erkak kishining ikkita nozik joyi bor ekan, biri ayollar bo‘lsa, ikkinchisi, shubhasiz, futboldir. Bugungi kunda esa ayollar futboli ham juda rivojlangan bo‘lib, u tomoshaboplik borasida erkaklar o‘yinidan aslo qolishmaydi. Ayollar futboli ham o‘zining Messi va Ronaldulariga, shuningdek, Chempionlar Ligasi, Jahon chempionati kabi nufuzli va yirik musobaqalarga ega. Ammo hozir bu musobaqalar va unda g‘olib chiqqan jamoalar haqida emas, balki dunyoning eng go‘zal ayol futbolchilariga to‘xtalamiz.
Aleks Morgan (31 yosh, AQSh)
AQShda tavallud topgan Aleks Morgan turli xil sport turlari orasida millionlar o‘yini bo‘lmish futbolni tanlagan. Hujumchi pozitsiyasida o‘ynaydigan futbolchi o‘zining yuqori texnikasi va kuchli zarbalari bilan maqtana oladi. Aleks bir necha yillardan beri ko‘plab nashrlar tomonidan dunyoning eng go‘zal ayol futbolchisi sifatida e’tirof etib kelinadi. Ammo bu uning asosiy yutug‘i emas, u Olimpiada o‘yinlari (London–2012) g‘olibi va ikki karra Jahon chempioni hisoblanadi. Uning ishonchli o‘yini va gollari tufayli AQSh 2019-yili Fransiyada o‘tkazilgan Jahon chempionatida (o‘z tarixida 4-marta) zafar quchadi. Taqqoslash uchun AQShning erkaklar jamoasi Jahon chempionatlarida 3-o‘rindan yuqoriga ko‘tarilmagan. “Orlando Prayd” klubida to‘p tepayotgan Morgan bo‘sh vaqtlarida bolalar uchun kitoblar yozish bilan shug‘ullanadi.
Karla Hamfri (24 yosh, Buyuk Britaniya)
O‘zining yoqimli tashqi ko‘rinishi bilan ko‘plab tomoshabinlar mehrini qozongan Karla Hamfri Angliyaning eng istiqbolli va iqtidorli o‘yinchilaridan biri sanaladi. Hamfrining oilasi “Arsenal” klubining muxlisi bo‘lgan. Hamfri esa 2006-yilda “kanonirlar” jamoasiga qo‘shilib, oilasiga ulkan quvonchni taqdim etadi. Garchi Karla u yerda uzoq vaqt qolmagan bo‘lsa ham, ko‘plab erkaklar qila olmaydigan ishni bajargani bilan bemalol maqtana oladi. Boisi “Arsenal” safida to‘p surish hammaga ham nasib etavermaydi. Hozirda Hemfri “Bristol Siti” jamoasi sharafini himoya qilmoqda.
Layza Andrioli (32 yosh, Braziliya)
Pentakampeonlar yurti – Braziliya terma jamoasida darvozabon bo‘lgan Layza tabiat in’om etgan go‘zallikka ega. U aynan ushbu xususiyatlaridan foydalanadi va o‘zini modelyerlik sohasida ham sinab ko‘rishga qaror qildi. Ammo ma’lum muddatdan (2015-yilda) so‘ng u yana futbolga qaytadi. Shundan so‘ng Layza yana katta sportni tark etib, shou-biznes va moda sohasiga sho‘ng‘iydi. Ungacha u “Internasional” klubida harakat qilgan.
Chjao Lina (28 yosh, Xitoy)
Bir qarashda uzun bo‘yli va oriq Chjao Linaning futbolchi ekanligiga ishonish qiyin. Ammo u Xitoy terma jamoasining asosiy darvozaboni hisoblanadi. U futbolchi bo‘lish istagi tufayli modelyerlikdan voz kechadi, bugungi kunda esa bundan zarracha ham afsuslanmasligi aniq.
2015-yilda Kanadada bo‘lib o‘tgan Jahon chempionatida Xitoy terma jamoasi chorak final bosqichiga qadar yetib boradi, bu natijada Linaning xizmatlari beqiyos bo‘ladi. Ayni damda u “Shanxay Vinpak” klubida raqib zarbalarini bartaraf etish bilan shug‘ullanmoqda.
Loren Sesselmann (37 yosh, Kanada)
Loren garchi 36 yoshda bo‘lishiga qaramay hamon professional faoliyatini davom ettirmoqda. Yuqorida qayd etilgan Aleks Morgan boshchiligidagi AQSh ayollari chempion bo‘lgan London–2012 Olimpiadasida Loren va uning jamoadoshlari (Kanada terma jamoasi) bronza medaliga sazovor bo‘lgan.
Himoyachi pozitsiyasida harakat qiladigan Loren Sesselmann hozirda Amerikaning “Santa Klarita Blu Hit” klubida to‘p tepmoqda. U futboldan tashqari o‘zining fitness markazlari tarmog‘ini yo‘lga qo‘ygan.
Mavzuga doir:
Izoh (0)