Turkmaniston prezidentiga pul tikish uchun totalizatorning mobil dasturi taqdim etildi

Turkmaniston prezidenti Gurbanguli Berdimuhamedov alabay itlari va axaltekin otlarining bayrami munosabati bilan majlis o‘tkazdi. Bu haqda “Xronika Turkmenistana” xabar berdi.

Agrosanoat majmuasini nazorat qiluvchi bosh vazir o‘rinbosari Esenmirat Orazgeldiyevning xabar berishicha, “mamlakatda o‘tkaziladigan poyga musobaqalariga ko‘proq zavq berish va mashhur axaltekin otlarining nomini abadiylashtirish uchun” ot poygalari uchun kuboklar va sovrinlarning eskizlari ishlab chiqilgan.

Bundan tashqari, bosh vazir o‘rinbosari “Turkman otlari” davlat birlashmasi va “Turkmansvyaz” agentligi hamkorlikda totalizator uchun dasturiy ta’minot va mobil dastur ishlab chiqqanini xabar qildi.

Prezident eskizlarga tuzatishlar kiritdi, shuningdek, mamlakatning barcha sohalarida, shu jumladan, ot yetishtirish sohasida ham yuqori texnologiyali ishlab chiqarishlarning joriy etilishini nazorat qilish to‘g‘risida ko‘rsatma berdi.

Keyin “Turkman otlari” davlat birlashmasi direktori Ahmet Berdiyev turkman otlarining milliy bayramini nishonlashga tayyorgarlik to‘g‘risida, bosh vazir o‘rinbosari Serdar Berdimuhamedov turkman alabaylari kuni va mamlakat mustaqilligining 30 yilligiga tayyorgarlik to‘g‘risida hisobot berdi.

Avvalroq Turkmaniston agrosanoat majmuasini nazorat qiluvchi bosh vazir o‘rinbosari Esenmirat Orazgeldiyev 28-yanvar kuni hukumati a’zolari bilan onlayn uchrashuv paytida prezident Gurbanguli Berdimuhamedovga alabaylar o‘rtasidagi go‘zallik tanlovi g‘olibi bo‘lgan itga beriladigan medal dizaynini taqdim etdi.

Shuningdek, Turkmaniston prezidenti Gurbanguli Berdimuhamedov 25-yanvar kuni Ashxobodda qurilayotgan yirik obyektlarni ko‘zdan kechirish vaqtida “Turkman alabay itlari” xalqaro assotsiatsiyasi buyurtmasi bilan kuchuklar uchun qurilayotgan maxsus boshpanalarni ham ko‘zdan kechirdi. Tashrifi yakunida Turkmaniston rahbari turkman alabayi bayrami va turkman oti milliy bayramini (Turkmanistonda aprel oyining oxirgi yakshanbasida nishonlanadi) birlashtirishni taklif qildi.