Туркманистон президентига пул тикиш учун тотализаторнинг мобил дастури тақдим этилди

Туркманистон президенти Гурбангули Бердимуҳамедов алабай итлари ва ахалтекин отларининг байрами муносабати билан мажлис ўтказди. Бу ҳақда «Хроника Туркменистана» хабар берди.

Агросаноат мажмуасини назорат қилувчи бош вазир ўринбосари Эсенмират Оразгелдиевнинг хабар беришича, «мамлакатда ўтказиладиган пойга мусобақаларига кўпроқ завқ бериш ва машҳур ахалтекин отларининг номини абадийлаштириш учун» от пойгалари учун кубоклар ва совринларнинг эскизлари ишлаб чиқилган.

Бундан ташқари, бош вазир ўринбосари «Туркман отлари» давлат бирлашмаси ва «Туркмансвяз» агентлиги ҳамкорликда тотализатор учун дастурий таъминот ва мобил дастур ишлаб чиққанини хабар қилди.

Президент эскизларга тузатишлар киритди, шунингдек, мамлакатнинг барча соҳаларида, шу жумладан, от етиштириш соҳасида ҳам юқори технологияли ишлаб чиқаришларнинг жорий этилишини назорат қилиш тўғрисида кўрсатма берди.

Кейин «Туркман отлари» давлат бирлашмаси директори Аҳмет Бердиев туркман отларининг миллий байрамини нишонлашга тайёргарлик тўғрисида, бош вазир ўринбосари Сердар Бердимуҳамедов туркман алабайлари куни ва мамлакат мустақиллигининг 30 йиллигига тайёргарлик тўғрисида ҳисобот берди.

Аввалроқ Туркманистон агросаноат мажмуасини назорат қилувчи бош вазир ўринбосари Эсенмират Оразгелдиев 28 январь куни ҳукумати аъзолари билан онлайн учрашув пайтида президент Гурбангули Бердимуҳамедовга алабайлар ўртасидаги гўзаллик танлови ғолиби бўлган итга бериладиган медал дизайнини тақдим этди.

Шунингдек, Туркманистон президенти Гурбангули Бердимуҳамедов 25 январь куни Ашхободда қурилаётган йирик объектларни кўздан кечириш вақтида «Туркман алабай итлари» халқаро ассоциацияси буюртмаси билан кучуклар учун қурилаётган махсус бошпаналарни ҳам кўздан кечирди. Ташрифи якунида Туркманистон раҳбари туркман алабайи байрами ва туркман оти миллий байрамини (Туркманистонда апрель ойининг охирги якшанбасида нишонланади) бирлаштиришни таклиф қилди.