2020-yilda Yevropa tiklanish va taraqqiyot banki “Korzinka.uz” supermarketlar tarmog‘iga 40 million dollar investitsiya kiritgani to‘g‘risida xabar berilgandi. “Korzinka.uz” supermarketlar tarmog‘i asoschisi va rahbari Zafar Hoshimovning so‘zlariga ko‘ra, buning uchun Singapurda Anglesey Investments PTE. LTD kompaniyasini yaratishda to‘g‘ri kelgan. Shundan so‘ng, ushbu kompaniya Anglesey Food MChJni (“Korzinka.uz”ga egalik qiluvchi) sotib olgan, deb yozadi Spot.
Bu O‘zbekistondagi MChJ shaklidagi kompaniyalar to‘g‘ridan to‘g‘ri investitsiyalarni jalb qilishi qiyinligi sabab amalga oshirilgan. Bu haqda tadbirkor “Iqtisodiyot o'sishini rag'batlantirishda moliya bozorining mavqei: Huquqiy, institutsional masalalar” anjumanida ma’lum qilgan.
Zafar Hoshimov O‘zbekistonda MChJlarga korporativ obligatsiyalarni chiqarishga ruxsat berilganini ijobiy baholab, uni inqilobiy hodisa deb atagan, biroq uning ta’kidlashicha, MChJlarga boshqa davlatlardagi kabi aksiyalarni chiqarishga ham ruxsat berish foyda beradi. Shunda bitimni imzolashda investorlarga ularning aksiyador ekanligi yozilgan 16 varaqli shartnomani o‘qishga majburlamay, shunchaki aksiyalarni berish mumkin bo‘ladi.
“Korzinka.uz” asoschisi, shuningdek, investitsiyalarni jalb qilayotgan kompaniyalarga xalqaro huquqlarni, masalan, inglizlarnikidan foydalanishga ruxsat berishni taklif qilgan. Bu bitimni yanada shaffof va potensial investorlar uchun tushunarli qilgani sabab foyda bergan bo‘lardi.
Hoshimovning ta’kidlashicha, hozirda investitsiyalarni jalb qilishda tranzaksiyaviy xarajatlar yuqori. “Korzinka.uz” holatida bitim summasi ozmi-ko‘pmi maqbul bo‘lgan bo‘lsa, 5-10 million dollarli investitsiyalarda xarajatlar ancha sezilarli bo‘ladi. Tadbirkor anjuman amaliy natijalari va o‘zgarishlar bilan muvaffaqiyatli bo‘lishiga umid bildirgan.
Anjumanda ishtirok etgan Oliy Majlis Senatining birinchi o‘rinbosari Sodiq Safoyev Zafar Hoshimov tomonidan ko‘tarilgan masala hozirda muhokama qilinayotganini va ularning bir qismi Toshkentda Xalqaro moliyaviy markazni yaratish loyihasida hisobga olinganini bildirgan. Masalan, undan xalqaro huquq o‘rin olishi kutilmoqda.
Izoh (0)