2021-yil yakuniga qadar 15 ming kilometr past kuchlanishli elektr tarmoqlari hamda 4 ming dona transformatorni yangilash ko‘zda tutilgan. Natijada O‘zbekistondagi 5 ming 377 ta mahallaning elektr ta’minoti yaxshilanadi. Bu haqda “Hududiy elektr tarmoqlari” AJ raisi Ulug‘bek Mustafoyev 15-mart, dushanba kuni jurnalistlarga bergan intervyusida ta’kidlab o‘tdi, deya xabar bermoqda “Daryo” muxbiri.
Mustafoyevning ta’kidlashicha, 2021-yilda ham elektr energiyasining narxi oshmasligi kutilmoqda.
“Tizimda qilinayotgan ishlar va o‘zgarishlar o‘z-o‘zidan bo‘layotgani yo‘q. Xalqimiz manfaati uchun katta mablag‘lar sarflanyapti. Mana ikki yildirki, tariflarni oshirganimiz yo‘q. Ikki yildan beri 295 so‘m turibdi.
Prezidentimiz bu yil ham tarifni oshirmaslik chorasini ko‘rish bo‘yicha topshiriq berdi. Hamma narsaning narxi oshyapti, lekin elektr narxi oshgani yo‘q. Agar biz oshirsak, ishlab chiqarishning ham, boshqa narsalarning ham tannarxi oshadi. Davlatimiz rahbari xalq manfaatini o‘ylab, bizga tannarxni kamaytirish masalasini qo‘ymoqda.
Besh barmoq barobar emas. Ayni paytda tarmog‘imizda 25 ming nafar odam ishlaydi. To‘g‘ri, bizning tizimda ham o‘g‘riliklar, nojo‘ya qilinayotgan ishlar juda ko‘p. Ammo aholining farovon hayot kechirishi uchun astoydil ishlashga harakat qilyapmiz”, — dedi Ulug‘bek Mustafoyev.
Bundan avval Xorazmga kuchli shamol va qor bo‘roni yopirilgani sabab viloyatdagi ko‘plab xonadonlar elektr energiyasisiz qolgani, O‘zbekistonda 1,35 mlrd dollarga yana uchta elektr stansiyasi qurilishi hamda Toshkentda 2021-yil oxiriga qadar barcha yoqilg‘i quyish shoxobchalarida elektrokarlarni quvvatlantirish mumkin bo‘lishi haqida xabar berilgandi.
Izoh (0)