2020 йилда Европа тикланиш ва тараққиёт банки «Korzinka.uz» супермаркетлар тармоғига 40 миллион доллар инвестиция киритгани тўғрисида хабар берилганди. «Korzinka.uz» супермаркетлар тармоғи асосчиси ва раҳбари Зафар Ҳошимовнинг сўзларига кўра, бунинг учун Сингапурда Anglesey Investmentс PTE. LTД компаниясини яратишда тўғри келган. Шундан сўнг, ушбу компания Anglesey Food МЧЖни («Korzinka.uz»га эгалик қилувчи) сотиб олган, деб ёзади Spot.
Бу Ўзбекистондаги МЧЖ шаклидаги компаниялар тўғридан-тўғри инвестицияларни жалб қилиши қийинлиги сабаб амалга оширилган. Бу ҳақда тадбиркор «Иқтисодиёт ўсишини рағбатлантиришда молия бозорининг мавқеи: Ҳуқуқий, институционал масалалар» анжуманида маълум қилган.
Зафар Ҳошимов Ўзбекистонда МЧЖларга корпоратив облигацияларни чиқаришга рухсат берилганини ижобий баҳолаб, уни инқилобий ҳодиса деб атаган, бироқ унинг таъкидлашича, МЧЖларга бошқа давлатлардаги каби акцияларни чиқаришга ҳам рухсат бериш фойда беради. Шунда битимни имзолашда инвесторларга уларнинг акциядор эканлиги ёзилган 16 варақли шартномани ўқишга мажбурламай, шунчаки акцияларни бериш мумкин бўлади.
«Korzinka.uz» асосчиси, шунингдек, инвестицияларни жалб қилаётган компанияларга халқаро ҳуқуқларни, масалан, инглизларникидан фойдаланишга рухсат беришни таклиф қилган. Бу битимни янада шаффоф ва потенциал инвесторлар учун тушунарли қилгани сабаб фойда берган бўларди.
Ҳошимовнинг таъкидлашича, ҳозирда инвестицияларни жалб қилишда транзакциявий харажатлар юқори. «Korzinka.uz» ҳолатида битим суммаси озми, кўпми мақбул бўлган бўлса, 5-10 миллион долларли инвестицияларда харажатлар анча сезиларли бўлади. Тадбиркор анжуман амалий натижалари ва ўзгаришлар билан муваффақиятли бўлишига умид билдирган.
Анжуманда иштирок этган Олий Мажлис Сенатининг биринчи ўринбосари Содиқ Сафоев Зафар Ҳошимов томонидан кўтарилган масала ҳозирда муҳокама қилинаётганини ва уларнинг бир қисми Тошкентда Халқаро молиявий марказни яратиш лойиҳасида ҳисобга олинганини билдирган. Масалан, ундан халқаро ҳуқуқ ўрин олиши кутилмоқда.
Изоҳ (0)