Qoraqalpog‘istonning Chimboy tumanida maktab filiali binosini rekonstruksiya qilish uchun ajratilgan mablag‘lar talon-toroj qilingani yuzasidan jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Departamentning Chimboy tuman bo‘limi hamda DXX tomonidan o‘tkazilgan tergovga qadar tekshiruvda Chimboy tumani Xalq ta’limi bo‘limi va “B-N.” MChJ mansabdor shaxslari tumandagi 6-sonli umumiy o‘rta ta’lim maktabi filiali binosini rekonstruksiya qilishda amalda bajarilmagan qurilish-ta’mirlash ishlarini qo‘shib yozish orqali 105,1 million so‘m budjet mablag‘larini talon-toroj qilgani aniqlangan.
Holat yuzasidan Chimboy tumani Xalq ta’limi bo‘limi va jamiyat mansabdor shaxslariga nisbatan Jinoyat kodeksining 167-moddasi (talon-toroj qilish), 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent viloyatida maktab ta’miriga ajratilgan 242 million so‘m, Farg‘onada bolalar va o‘smirlar sport maktabini ta’mirlashda 150 million so‘m, Buxoroda qurilish firmasi maktabga arzon elektr chiroqlarni o‘rnatish orqali 84 million so‘m, Samarqand viloyatidagi qurilish-ta’mirlash ishlarida 7 milliard so‘m talon-toroj qilingani haqida xabar berilgan edi.
Izoh (0)