Samarqand shahrida yashovchi shaxs mast holatda tanishini pichoqlab o‘ldirib qo‘ydi, deya xabar bermoqda Tergov departamenti.
Ma’lum qilinishicha, 2021-yilning 13-mart kuni soat 22:30 larda 46 yoshli B.R.ning Samarqand shahri Sattepo mavzesi “X.Sheroziy” MFYda joylashgan yashash xonadoniga tanishi 48 yoshli A.M. mast holatda kelib, u bilan spirtli ichimlik iste’mol qilishni taklif qilgan.
Birozdan so‘ng ular o‘zaro janjallashib qolgan. Oqibatda B.R. qo‘lidagi oshxona pichog‘i bilan A.M.ning ko‘krak qismiga bir marotaba urib, jarohat yetkazgan.
Shundan so‘ng B.R. yordam berish maqsadida tashqariga chiqib, do‘kon ishchisidan yordam so‘ragan. Biroq o‘tkazilgan tibbiy muolajalarga qaramasdan A.M. shifoxonada vafot etgan.
Olib borilgan tergovga qadar tekshiruv harakatlari davomida B.R. muqaddam Rossiya Jinoyat kodeksining 105-moddasi (qotillik jinoyati) bilan sudlanganligi aniqlangan.
Mazkur holat yuzasidan Samarqand shahri bo‘yicha IIO FMB huzuridagi tergov bo‘limi tomonidan B.R.ga nisbatan O‘zbekiston Jinoyat kodeksining 104-moddasi 3-qismi “d” bandi (jabrlanuvchining o‘limiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, protsessual tartibda ushlangan.
Hozirda tergov davom etmoqda.
Bundan avval Samarqandda kuyov qaynotasini pichoqlagani, Surxondaryoda to‘satdan vafot etgani aytilgan shaxs kaltaklab o‘ldirilgani aniqlangani hamda Samarqandda turmush o‘rtog‘ini pichoqlab o‘ldirgan shaxs 9 yilga qamalgani haqida xabar berilgandi.
Izoh (0)