Самарқанд шаҳрида яшовчи шахс маст ҳолатда танишини пичоқлаб ўлдириб қўйди, дея хабар бермоқда Тергов департаменти.
Маълум қилинишича, 2021 йилнинг 13 март куни соат 22:30 ларда 46 ёшли Б.Р.нинг Самарқанд шаҳри Саттепо мавзеси «Х.Шерозий» МФЙда жойлашган яшаш хонадонига таниши 48 ёшли А.М. маст ҳолатда келиб, у билан спиртли ичимлик истеъмол қилишни таклиф қилган.
Бироздан сўнг улар ўзаро жанжаллашиб қолган. Оқибатда Б.Р. қўлидаги ошхона пичоғи билан А.М.нинг кўкрак қисмига бир маротаба уриб, жароҳат етказган.
Шундан сўнг Б.Р. ёрдам бериш мақсадида ташқарига чиқиб, дўкон ишчисидан ёрдам сўраган. Бироқ ўтказилган тиббий муолажаларга қарамасдан А.М. шифохонада вафот этган.
Олиб борилган терговга қадар текширув ҳаракатлари давомида Б.Р. муқаддам Россия Жиноят кодексининг 105-моддаси (қотиллик жинояти) билан судланганлиги аниқланган.
Мазкур ҳолат юзасидан Самарқанд шаҳри бўйича ИИО ФМБ ҳузуридаги тергов бўлими томонидан Б.Р.га нисбатан Ўзбекистон Жиноят кодексининг 104-моддаси 3-қисми «д» банди (жабрланувчининг ўлимига сабаб бўлган қасддан баданга оғир шикаст етказиш) билан жиноят иши қўзғатилиб, процессуал тартибда ушланган.
Ҳозирда тергов давом этмоқда.
Бундан аввал Самарқандда куёв қайнотасини пичоқлагани, Сурхондарёда тўсатдан вафот этгани айтилган шахс калтаклаб ўлдирилгани аниқлангани ҳамда Самарқандда турмуш ўртоғини пичоқлаб ўлдирган шахс 9 йилга қамалгани ҳақида хабар берилганди.
Изоҳ (0)