Qo‘qon davlat pedagogika instituti ijarada turuvchi talabalarni tizimli nazorat qiluvchi smartfon va planshetlar uchun “QDPI Ijara” deb nomlangan maxsus mobil dasturni ishga tushirdi, deb xabar beradi O‘zA.
Ma’lumotlarga ko‘ra, mazkur oliy ta’lim muassasasida bugungi kunda 8 mingdan ortiq yigit-qiz tahsil olmoqda, ularning 608 nafari talabalar yotoqxonasida turadi, 1520 nafari esa ijarada yashaydi.
Ta’kidlanishicha, boshqa joylarda bo‘lgani kabi bu yerda ham talabalarni turar joy bilan ta’minlash, ijarada yashovchi talabalar bilan individual ishlashda o‘z yechimini kutayotgan muammolar bor.
Mazkur ishlar doirasida yangilikka qo‘l urilib, elektron dastur yaratilgan. “Mobil dasturda ijarada yashaydigan talabalar haqida to‘liq ma’lumot olish, ularning manzillarini xaritada ko‘rsatib berish, ijara manziliga qadar boshlab borishi bilan talabalarning ustoz-murabbiylari, ota-onalari, institut rahbariyati uchun beminnat yordamchi bo‘ldi”, — deyiladi xabarda.
Mobil dastur hozircha Android tizimida ishlovchi qurilmalar uchun mo‘ljallangan bo‘lib, tez kunlarda uning iOS operatsion tizimlari uchun versiyasi ham foydalanishga taqdim etilishi rejalashtirilgan. “QDPI Ijara” ilovasini Qo‘qon davlat pedagogika instituti rasmiy saytidan yuklab olish mumkin.
Eslatib o‘tamiz, fevral oxirida Toshkentning Yunusobod tumanida besh nafar talaba o‘lik holda topilgani, ulardan biri Inha universitetining 1-bosqich talabasi ekanligi to‘g‘risida xabar berilgan edi. Fojiadan so‘ng ijarada yashayotgan talabalarning sharoitlari o‘rganiladigan bo‘ldi.
Izoh (0)