Nukus shahar tibbiyot birlashmasida koronovirus infeksiyasiga gumon qilingan bemorlarni diagnostik saralash va davolash uchun mo‘ljallangan markazda ishlagan, lekin rag‘batlantirish pullari to‘liq to‘lab berilmagan ikki fuqaroning muammoasi ijobiy hal etildi. Bu haqda Nukus shahar adliya bo‘limiga tayanib, “Kar24.uz” xabar berdi.
Ma’lum qilinishicha, ikki nafar hamshira rag‘batlantirish pullari to‘liq to‘lab berilmaganidan norozi bo‘lib, Nukus shahar adliya bo‘limiga murojaat qilgan.
O‘rganishlar davomida fuqarolar N.X. va A.D. COVID-19 infeksiyasiga chalingan bemorlarni davolashga ixtisoslashgan maxsus kasalxonaga aylantirilgan Respublika o‘yin turlari va yengil atletika bo‘yicha ixtisoslashtirilgan bolalar va o‘smirlar sport maktabiga Nukus shahar tibbiyot birlashmasining buyruqlariga asosan hamshira qilib biriktirilgani ma’lum bo‘ldi. Ular markazda haqiqatan ham kuniga 12 soatdan (fuqarolar N.X. 360 soat, A.D. 324 soat) ishlagani aniqlangan.
Ta’kidlanishicha, birlashma tomonidan tasdiqlangan tabelda fuqarolar N.X., A.D. kunlik 8 soatdan ishlagan deb noto‘g‘ri ko‘rsatilgan.
Vazirlar Mahkamasining 2020-yil 24-sentabrdagi 583-sonli qarori bilan “Koronavirus infeksiyasi bilan kasallangan bemorlarni davolash obyektlarida hamda koronavirus infeksiyasini aniqlash laboratoriyalarida faoliyat olib borayotgan xodimlarga maxsus rag‘batlantirish to‘lovlarini to‘lash tartibi to‘g‘risida”gi nizom tasdiqlangan. Tibbiyot birlashmasi esa ushbu nizomda keltirilgan maxsus to‘lovlarni ikki hamshiraga to‘lab bermagan.
Shu bois adliya bo‘limi tomonidan birlashmaga “qonun hujjatlarining buzilishi, ularning sabablari va unga olib keluvchi shart-sharoitlarni bartarf qilish” to‘g‘risidagi taqdimnoma kiritilgan, biroq tibbiyot birlashmasi tomonidan bo‘limning qonuniy talablari bajarilmasdan, taqdimnoma qanoatlantirilmagan.
Yuqoridagi holatlardan kelib chiqib, fuqarolarning buzilgan huquqlarini himoya qilish maqsadida Fuqarolik ishlari bo‘yicha Nukus tumanlararo sudiga da’vo ariza kiritilgan, da’vo arizaga asosan fuqaro N.X.ga 7 million so‘m va fuqaro D.A.ga 6,75 million so‘m undirib berish to‘g‘risida sudning hal qiluv qarori chiqarilgan.
Avvalroq Toshkentda koronavirusga chalingan hamshiradan olib qolingan 12 million so‘m miqdoridagi soliq to‘lovlari undirib berilgan edi.
Ma’lumot uchun, O‘zbekistonda koronavirus infeksiyasidan zararlangan bemorlar bilan muloqotga kirishadigan, zararlangan bemorlar joylashtirilgan obyektlarda hamda koronavirus infeksiyasini aniqlash laboratoriyalarida faoliyat olib borayotgan tibbiyot xodimlariga har 14 kunlik faoliyat davri uchun maxsus qo‘shimcha rag‘batlantirish to‘lovi belgilangan. Shuningdek, bemorlar bilan ishlash davomida koronavirus infeksiyasini yuqtirib olgan tibbiyot, sanitariya-epidemiologiya xizmati va boshqa xodimlarga 100 million so‘mdan to‘lanadi.Koronavirus infeksiyasiga qarshi kurashish doirasida bemorlar bilan ishlagan vaqtida koronavirus infeksiyasini yuqtirish natijasida og‘ir ahvolga tushgan va sog‘lig‘i tiklanmagan taqdirda tibbiyot, sanitariya-epidemiologiya xizmati va boshqa xodimlarga yoki ularning oila a’zolariga esa 250 million so‘m miqdorida bir martalik to‘lovlar to‘lanadi.
Izoh (0)