Qashqadaryoda jamoat transportida niqobsiz yurish taqiqlandi

Qashqadaryoda 17-martdan boshlab  jamoat transportida niqobsiz yurish taqiqlandi. Bu haqda viloyat transport boshqarmasi matbuot xizmati xabar berdi.

Avtobus, mikroavtobus, yo‘nalishsiz taksi xizmatidan foydalanganda haydovchi va yo‘lovchilar tibbiy niqobda bo‘lishi kerak. Yo‘lovchilarning jamoat transportiga niqobsiz chiqishi qat’iyan taqiqlanadi.

Shuningdek, tartibga ko‘ra yo‘lovchi tashuvchi transport vositalari har 4 soatda dezinfeksiya qilinishi nazoratga olinadi.

Xabarda ta’kidlanishicha, ushbu tartib viloyat bo‘yicha amal qiladi.

Avvalroq Qashqadaryo viloyati hokimi Zoir Mirzayev viloyatda oxirgi 10 kunda 8000 nafardan ortiq fuqarodan koronavirusga qarshi test olingani, test natijalariga ko‘ra, hududda kasallik chalinish holati qayd etilmaganini aytgani haqida xabar berilgan edi. “Ammo ehtiyotkorlik va tartib-intizom kelgusida har birimizning salomatligimiz mustahkamligiga xizmat qiladi. Shunday ekan, jamoat joylari va transport vositalarida tibbiy niqobsiz yurish qonunchilikka asosan jarimaga tortishga sabab bo‘ladi”, — degan u.

Toshkentda ham “karantin talablariga rioya qilish” nazoratga olinib, yo‘lovchilarning niqob taqishi majburiy etib belgilangan. Adliya vazirligi jamoat joylarida tibbiy niqobsiz yurganlik uchun jarima borligini eslatib o‘tgan.