Navro‘z bayrami arafasida sinov tariqasida Andijon va Xonobod shaharlari o‘rtasida yo‘lovchi poyezd qatnovi yo‘lga qo‘yiladi. Bu haqda “Daryo” muxbiri Umidjon Mamarasulov xabar berdi.

Andijon viloyat transport boshqarmasi axborot xizmatining aniqlik kiritishicha, aholining temiryo‘l transportiga bo‘lgan ehtiyojini qondirish, ularga qulayliklar yaratish maqsadida boshlangan Andijon—Savay—Xonobod temiryo‘l uchastkalaridagi barcha qurilish ishlari yakuniga yetib qolgan. Shu munosabat bilan Navro‘z bayrami arafasida Andijon—Xonobod temiryo‘l liniyasida sinov tariqasida yo‘lovchi poyezd qatnovi yo‘lga qo‘yiladi.

Ta’kidlanishicha, mazkur bunyodkorlikning bosh loyihasi “Toshtemiryo‘lloyiha” mas’uliyati cheklangan jamiyati mutaxassislari tomonidan ishlab chiqilgan. Unga ko‘ra, bu yerda 520 ming kub metr tuproq ishlari bajarilgan. Shuningdek, 45 ta sun’iy inshoot (1 ta temiryo‘l ko‘prigi) qurilgan. Mavjud 53,2 kilometr temiryo‘llar ta’mirlanib, 10,2 kilometr masofada yangi po‘lat izlar yotqizilgan. Shuningdek, jami 7 ta avtomobil va temiryo‘l kesishmasini bunyod etilgan

Qayd etilishicha, Prezident Shavkat Mirziyoyev 2020-yil 21—22-may kunlari Andijon viloyatiga tashrifi davomida Transport vazirligi hamda “O‘zbekiston temir yo‘llari” AJga Andijon—Savay—Xonobod temiryo‘l uchastkasini modernizatsiya qilish hamda yo‘nalishda yo‘lovchi poyezd reyslarini yo‘lga qo‘yish bo‘yicha vazifalar bergan.