Toshkentning Chilonzor tumanidagi “Qatortol” mahallasida joylashgan uylar o‘rasidagi hududda xususiy bog‘cha qurilishi tadbirkor va aholi o‘rtasida yuzaga kelgan mojaro sabab vaqtincha to‘xtatildi. Bu haqda tuman hokimligi matbuot xizmati xabar berdi.
Ma’lum bo‘lishicha, qurilish bo‘yicha Chilonzor tumani hokimining tegishli qarori qabul qilingan. Biroq mazkur qarorga aholining e’tirozi hisobga olinib, ajratilgan yer maydoni biroz o‘zgartirilgan holda yangidan qaror qabul qilingan.
Unga ko‘ra, Chilonzor tumani, 9-mavze 17, 19 va 20-uylar oralig‘ida umumiy maydoni 0,15 gektar yer maydoni “Karyera obrazovaniya” MChJga xususiy bolalar bog‘chasini yangidan tashkil etish uchun ajratib berilgan.
Aniqlanishicha, ushbu hujjatlar to‘plangan paytda faoliyat olib borgan mahalla raisi va shirkat rahbarlari aholi bilan maslahatlashmagan. MFY raisi tomonidan bayonnoma tuzilgan. Ayni paytdagi mahalla raisi Parda Ergashevning so‘zlariga ko‘ra, aholi hududdagi yashil maydonni saqlab qolish niyatida. Shu bois, mahalla aholisi o‘z noroziligini bildirib, ushbu nizoli vaziyatni sud orqali hal qilishga qaror qilgan.
Bugungi kunda aholi tomonidan sudga ariza topshirilgan va ikkala tomon sud qarorini kutishga kelishgan. Shu sababli hozirda xususiy MTTning qurilish jarayonlari sud qarori chiqishiga qadar to‘xtatilgan.
Avvalroq Toshkentda bir qator ko‘p qavatli turar joy binolari noqonuniy qurilayotgani aniqlansa-da, qurilish ishlari to‘xtatilmagani ma’lum qilingani, Nukusda kamchiligi aniqlangan ko‘p qavatli uyning devori buzib tashlangani hamda Farg‘onada ko‘p qavatli turar joylar o‘rtasida barcha qurilishlar to‘xtatilib, bolalar va sport maydonchalari qayta tiklanishi haqida xabar berilgandi.
Mavzuga doir:
Izoh (0)