AQShda mashhur narkobaron Pablo Eskobarga tegishli nodir 911 RSR rusumli Porsche avtomobili sotuvga qo‘yildi. Bu haqda Tengrinews xabar berdi.
DuPont Registry sayti 1974-yilda Xalqaro chempionlar poygasi (IROC) uchun chiqarilgan 15 ta Porsche 911 RSR rusumidagi avtomashinalardan birini sotilishini e’lon qildi. Lekin musobaqalarda ularning faqat 12 tasi ishtirok etgan. Sotuvga qo‘yilgan sportkarni braziliyalik poygachi Emerson Fittipaldi boshqargan.
Mazkur avtomobil 1978-yilda Deytonda bo‘lib o‘tgan 24 soatlik poygalarda ham ishtirok etgan, shundan keyin avtoulov Kolumbiyada Eskobarning kolleksiyasidan o‘rin olgan. Narkobaronning o‘limidan keyin, mashina AQShga olib kelingan va 911 RSR avvalgi ko‘rinishiga keltirilgan.
Sotuvchi kolumbiyalik narkobaronga tegishli bo‘lgan kam nusxadagi sportkar uchun 2,2 million dollar so‘ramoqda. Avtomobilning yuqori narxi nafaqat uning Eskobar kolleksiyasidan joy olgani, balki modelning tarixiy qiymati bilan ham izohlanadi. Sotuvchining ta’kidlashicha, mashinada ushbu nusxaning haqiqiyligini tasdiqlovchi barcha kerakli sertifikatlar mavjud.
Ma’lumot uchun, Pablo Eskobar – kolumbiyalik siyosatchi va narkobaron. U 1949-yil 1-dekabrda tug‘ilgan. 1993-yilning 2-dekabrida, 44 yoshga to‘lganidan bir kun o‘tib, Kolumbiyaning Medelyin shahrida politsiya snayperi tomonidan otib o‘ldirilgan.
Bu odam 80–90-yillarda narkotik savdosi orqali aqlbovar qilmas boylik orttirgan va hatto dunyoning eng boy odamlari safiga kiritilgan. Xususan, 1989-yilda Forbes jurnali Eskobarning boyligi 3 milliard dollardan ortiq ekanini yozgan.
“Buqalarni yaxshi ko‘raman, lekin avtomobillar menga undan ham ko‘proq yoqadi. Oilamda tezlikni yaxshi ko‘rishadi”, — degan edi Eskobar.
Avvalroq Avstraliyadagi Shannons auksioni orqali 1958-yilda ishlab chiqarilgan Porsche 356A modeli sotilgan edi. Savdolar yakunida erishilgan narx sotuvchilarning o‘zini ham hayron qoldirgan: xaridor zang bosgan kabrioletni 178,5 ming AQSh dollarga sotib olgan.
Izoh (0)