АҚШда машҳур наркобарон Пабло Эскобарга тегишли нодир 911 RSR русумли Porsche автомобили сотувга қўйилди. Бу ҳақда Tengrinews хабар берди.
DuPont Registry сайти 1974 йилда Халқаро чемпионлар пойгаси (IROC) учун чиқарилган 15 та Porsche 911 RSR русумидаги автомашиналардан бирини сотилишини эълон қилди. Лекин мусобақаларда уларнинг фақат 12 таси иштирок этган. Сотувга қўйилган спорткарни бразилиялик пойгачи Эмерсон Фиттипальди бошқарган.
Мазкур автомобиль 1978 йилда Дейтонда бўлиб ўтган 24 соатлик пойгаларда ҳам иштирок этган, шундан кейин автоулов Колумбияда Эскобарнинг коллекциясидан ўрин олган. Наркобароннинг ўлимидан кейин, машина АҚШга олиб келинган ва 911 RSR аввалги кўринишига келтирилган.
Сотувчи колумбиялик наркобаронга тегишли бўлган кам нусхадаги спорткар учун 2,2 миллион доллар сўрамоқда. Автомобилнинг юқори нархи нафақат унинг Эскобар коллекциясидан жой олгани, балки моделнинг тарихий қиймати билан ҳам изоҳланади. Сотувчининг таъкидлашича, машинада ушбу нусханинг ҳақиқийлигини тасдиқловчи барча керакли сертификатлар мавжуд.
Маълумот учун, Пабло Эскобар – колумбиялик сиёсатчи ва наркобарон. У 1949 йил 1 декабрда туғилган. 1993 йилнинг 2 декабрида, 44 ёшга тўлганидан бир кун ўтиб, Колумбиянинг Меделйин шаҳрида полиция снайпери томонидан отиб ўлдирилган.
Бу одам 80–90 йилларда наркотик савдоси орқали ақл бовар қилмас бойлик орттирган ва ҳатто дунёнинг энг бой одамлари сафига киритилган. Хусусан, 1989 йилда Forbes журнали Эскобарнинг бойлиги 3 миллиард доллардан ортиқ эканини ёзган.
«Буқаларни яхши кўраман, лекин автомобиллар менга ундан ҳам кўпроқ ёқади. Оиламда тезликни яхши кўришади», — деган эди Эскобар.
Аввалроқ Австралиядаги Shannons аукциони орқали 1958 йилда ишлаб чиқарилган Porsche 356А модели сотилган эди. Савдолар якунида эришилган нарх сотувчиларнинг ўзини ҳам ҳайрон қолдирган: харидор занг босган кабриолетни 178,5 минг АҚШ долларга сотиб олган.
Изоҳ (0)