Toshkent shahar sog‘liqni saqlash bosh boshqarmasi boshlig‘i Anvar Alimov AOKAda o‘tkazilgan matbuot anjumanida karantin choralari kuchaytirilishi bilan bog‘liq mish-mishlarga oydinlik kiritdi.
“Yanvar oyidan buyon koronavirusga olingan test natijalarini tahlil qilsak, 0,1 foiz holatda kasallik aniqlanyapti. Ularning aksariyati simptomsiz ko‘rinishda bo‘lgani uchun uy sharoitida davolanyapti.
Kuni kecha o‘tkazilgan xalq deputatlari shahar kengashi yig‘ilishida qabul qilingan qarorda birorta yangi, kuchaytirish bo‘yicha band yo‘q.
Bugun faqatgina mavjud talablar ustidan nazoratni kuchaytirish masalasi ko‘rilyapti. Talab etilayotgan eng asosiy uch narsa — niqob taqish, qo‘l yuvish, ijtimoiy masofani saqlash”, — dedi Alimov.
Eslatib o‘tamiz, 14-mart kuni O‘zbekistonda dekabrdan beri birinchi marta bir kunda 100 dan ortiq odamda koronavirus aniqlanib, shundan 93 tasi Toshkent shahrida qayd etilgandi. Poytaxtda koronavirusga chalinish holatlari, asosan, o‘quvchilar, talabalar va tashkilot xodimlari orasida ko‘paygan. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan, 117-sonli bog‘chada ikki nafar tarbiyachi va bolalarda koronavirus aniqlangani sabab mazkur bog‘cha vaqtincha yopildi.
Bundan avval Toshkent shahridagi taksi va qurilish sohasida karantin choralari kuchaytirilishi, poytaxt hokimligi va uning tizimidagi barcha tuzilmalarda turli yig‘ilishlarni o‘tkazish taqiqlangani haqida xabar berilgan edi.
Koronavirus keng tarqalishining oldini olish maqsadida Toshkentdagi ayrim maktablarda o‘qish bosqichma-bosqich masofaviy shaklga o‘tkazilmoqda, bozor va savdo markazlarida karantin talablari kuchaytirildi.
Izoh (0)