Navoiy shahrida mas’uliyati cheklangan jamiyatlardan biriga tegishli bo‘lgan yerni noqonuniy ravishda sotishga uringan erkak qo‘lga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, Bosh prokuratura huzuridagi Departamentning Navoiy shahar bo‘limi tomonidan DXXning viloyat boshqarmasi bilan hamkorlikda tadbirkorlik subyektlarining huquqlarini himoya qilish yuzasidan tezkor tadbir o‘tkazilgan.
Tadbirda X.T. ismli shaxs noqonuniy daromad orttirish maqsadida fuqaro O.ning ishonchiga kirib, aslida “T.” nomli MChJga qarashli Mahmud Torobiy ko‘chasida joylashgan 200 kvadrat metr yer maydonini 150 ming dollarga sotishga kelishib olgani aniqlangan. U kelishilgan pulning 70 ming dollarini firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan X.T.ga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Mavzuga doir: Buxoro tumani hokimligi zaxirasidagi yerni 23,5 ming dollarga sotmoqchi bo‘lgan shaxs ushlandi
Izoh (0)