Ўзбекистоннинг 6 та туманида раҳбарлик қилиб келаётган аёл ҳокимларнинг фаолиятига «аъло» баҳо қўйишга ҳали эрта. Бу ҳақда Сенат раиси Танзила Норбоева Республика хотин-қизлар жамоатчилик кенгашининг 15 март, душанба куни ўтказилган биринчи йиғилишидан сўнг ОАВ вакилларига берган интервьюсида таъкидлаб ўтди, дея хабар бермоқда «Дарё» мухбири Миролим Исажонов.
«Аёл ҳокимларнинг фаолиятига ‘яхши’ баҳо қўяман. ‘Аълo’ дейишга ҳали вақт бор. Қачонки, бугун йиғилишда муҳокама қилинган муаммолар, турли норозиликлар бутунлай бартараф этилсагина, сўнг биз ‘аълo’, деб баҳо қўйишимиз мумкин.
Лекин уларнинг бугунги ҳаракатига бемалол ‘яхши’, дея баҳо бера оламиз. Сабаби, хабарингиз бор, туманларимиз ҳозирда ижтимоий ва иқтисодий келиб чиқишидан ‘қизил’, ‘сариқ’ ҳамда ‘яшил’ каби рейтингларга бўлинган. Аҳволи жуда ёмон бўлган туманлар ‘қизил’, ўртачаси ‘сариқ’ ва ривожланган туман ‘яшил’ деб баҳоланмоқда. Бизнинг аёллар шаҳар ва туманларни қабул қилаётганида уларнинг кўпи ‘қизил’ ҳудуд эди. Аёл ҳокимлар ўз саъй-ҳаракати билан туманларини ‘яшил’ ҳудудга олиб чиқишга муваффақ бўлишди.
Бироқ улар одамларимизнинг муаммоларини тўлиқ ҳал қилиб, туманини қаттиқ ривожлантириб юборганидан кейин ‘аълo’ баҳо қўямиз. Аёл ҳокимлар ‘аълo’га олиб чиқишига мен ишонаман, бу уларнинг қўлидан келади», — деди Норбоева.
Мавзуга доир:
- Шавкат Мирзиёев тез орада вилоят ҳокимлари орасида ҳам аёллар бўлишига умид билдирди
- «Қўша-қўша ортиқча уйлар ва бизнес лойиҳалар қилолмаганмиз». Аёл ҳокимлар даромадлар декларациясига доир қонун лойиҳаси ҳақида
- Танзила Норбоева: «Уялиб қолмаслик учун аёл ҳокимларга ўзим ёрдам бериб турибман»
- «Хижолатдаман, ўзимни жиловлашим керак эди». Бўстон ҳокими Садбархон Мамитова фермерларни камситаётгани ёзилган аудио бўйича изоҳ берди
Изоҳ (0)