Surxondaryo viloyati Sariosiyo tumanida 22 yoshli yigit avtomashinada YTHga uchrab, halok bo‘ldi, deya xabar bermoqda YHXBB.
Ma’lum qilinishcha, YTH 2021-yil 13-mart kuni 22:30 atrofida “Niloba” mahallasi hududidan o‘tuvchi M-41 avtomobil yo‘lining 1 456-kilometrida yuz bergan. Surishtiruv davomida avtohalokatni tumanning “Turmushobod” mahallasida yashovchi 22 yoshli yigit sodir etgan.
Yigit otasiga tegishli bo‘lgan LADA Granta mashinasida harakatlanib kelayotib, boshqaruvni yo‘qotgan va yo‘lning o‘ng chetidagi ariqdan o‘tib ketgan. Shundan so‘ng mashina daraxtga urilib, yigit voqea joyida halok bo‘lgan.
Aniqlanishicha, halokatga mashinaning katta tezlikda boshqarilgani va shu kunda yomg‘ir yog‘ib, ob-havoning yomonligi sabab bo‘lgan. Bundan tashqari, yigit haydovchilik guvohnomasini olganiga bir yil bo‘lgani sababli hali mashina boshqarish malakasi yetarli bo‘lmagan.
Bundan avval Surxondaryo va Samarqandda sodir bo‘lgan YTHlar oqibatida 4 kishi halok bo‘lgani, Jizzaxda me’yoridan 2 barobar ko‘p yuk ortgan Isuzu o‘zidan oldingi transportni urib, uni ag‘darib yuborgani hamda Samarqandda Damas 10 yoshli bolani urib yuborgani haqida xabar berilgandi.
Izoh (0)