O‘zbekistonda boshqaruv tizimida xotin-qizlarning ulushi 33 foizga yetdi, 1,5 mingga yaqin ayollar rahbarlik lavozimlarida ishlamoqda. Ularning olti nafari tuman va shaharlarga rahbarlik qilmoqda. Prezident Shavkat Mirziyoyev “tez orada viloyatlar rahbarlari orasida ham ayollar bo‘lishiga umid bildirdi”. Bu haqda Prezident matbuot xizmatining “Maxsus rakurs” ko‘rsatuvida ma’lum qilindi.
“O‘zlarining fidoiyligi, vatanparvarligi, islohotlarga ishonchi bilan, yurtimizdagi hozirgi islohotlarni amalga oshirish uchun bellarini mahkam bog‘lab, olti hududda ayollarimiz hokimlik qilyapti. Men Namanganga tashrifim vaqtida ham aytgandim, qani endi vaqt tezroq o‘tsayu, bularning ichidan ham viloyat hokimi topilsa, juda minnatdor bo‘lardim”, — deb aytgan Shavkat Mirziyoyev.
2020-yilning fevral—mart oylarida O‘zbekistonning olti hududiga ayol-hokimlar tayinlangan edi. Jumladan, Dilfuza O‘rolova Sirdaryoning Boyovut tumaniga, Nargiza Ne’matova Buxoroning Olot tumaniga, Sadbarxon Mamitova Andijonning Bo‘ston tumaniga, Maqsuda Mustafoyeva Qashqadaryoning Qarshi tumaniga, Zulayho Mahkamova Namanganning To‘raqo‘rg‘on tumaniga, Gavhar Alimova esa Samarqand viloyatining Kattaqo‘rg‘on shahriga hokim bo‘lgan edi.
Mavzuga doir:
- Shavkat Mirziyoyev: “Ayol kishi rahbar bo‘lsa, xursand bo‘laman”
- Tanzila Norboyeva: “Uyalib qolmaslik uchun ayol hokimlarga o‘zim yordam berib turibman”
- “Kimlargadir bu ish yoqmas, lekin menga yoqadi”. Shavkat Mirziyoyev — ayollarning hokim etib tayinlanishi haqida
- Shavkat Mirziyoyev Toshkent shahri tumanlaridan biriga ayol hokim tayinlashni taklif qildi
Izoh (0)