Prezident Shavkat Mirziyoyev 15-mart kuni 2021-yilda elektr energetikasi sohasida amalga oshiriladigan loyihalar bilan tanishdi.
Ma’lum qilinishicha, aholi va iqtisodiyot tarmoqlarining elektr energiyasiga bo‘lgan talabi yildan yilga ortib bormoqda. Buni ta’minlash maqsadida eskirgan podstansiyalar va uzatish tarmoqlari bosqichma-bosqich yangilab kelinmoqda.
Xususan, 2021-yil magistral elektr tarmoqlari bo‘yicha umumiy qiymati 140 million dollar bo‘lgan 6 ta loyiha rejalashtirilgan. Ulardan biri 14 ta podstansiyani modernizatsiya qilish loyihasidir. Buning samarasida Qoraqalpog‘iston va viloyatlarda jami 1 ming 430 megavatt qo‘shimcha quvvat yaratiladi. Ushbu podstansiyalardagi yillik elektr energiyasi isrofi 1,5 million dollarga, ta’mirlashga sarflanadigan xarajatlar qariyb 16 million dollarga kamayadi. Hisobga olish tizimidagi xatoliklar barham topadi.
Qolgan 5 ta loyiha yangi podstansiyalar va magistral elektr uzatish tarmoqlarini qurish hamda tiklashga qaratilgan.
Past kuchlanishli elektr tarmoqlarini modernizatsiya qilish bo‘yicha ham keng ko‘lamli ishlar belgilangan. Xususan, 15 ming kilometr elektr uzatish tarmoqlarini, 4 mingta transformatorni yangilash choralari ko‘rilgan. Bu ishlar natijasida O‘zbekistondagi 5 ming 377 ta mahallaning elektr ta’minoti yaxshilanadi.
Prezident bu loyihalarning iqtisodiy samaradorligi va ijtimoiy ahamiyatini alohida ta’kidlab, ularni sifatli bajarish, elektr energiyasi ta’minoti barqarorligini oshirish bo‘yicha topshiriqlar berdi.
Bundan avval Xorazmga kuchli shamol va qor bo‘roni yopirilgani sabab viloyatdagi ko‘plab xonadonlar elektr energiyasisiz qolgani, O‘zbekistonda 1,35 mlrd dollarga yana uchta elektr stansiyasi qurilishi hamda Toshkentda 2021-yil oxiriga qadar barcha yoqilg‘i quyish shoxobchalarida elektrokarlarni quvvatlantirish mumkin bo‘lishi haqida xabar berilgandi.
Izoh (0)