“Olmaliq KMK” AJ tomonidan Toshkent shahridagi Inha universiteti o‘qituvchilari va bir qator ommaviy axborot vositalari uchun ilmiy-ta’lim tizimining innovatsion rivojlanishini targ‘ib qilishga qaratilgan press-tur tashkil etildi. Tadbir ishtirokchilari “Olmaliq KMK” AJ Nodir metallar va qattiq qotishmalar ishlab chiqarish bo‘yicha ilmiy ishlab chiqarish birlashmasiga (NM QQ ICh IIChB) va Chirchiq shahrida joylashgan O‘zbekiston—Koreya ilmiy-texnologik markaziga tashrif buyurishdi.
Tashkilotchilar ta’kidlaganidek, press-turning asosiy vazifasi — oliy o‘quv yurtlarida tahsil olayotgan iqtidorli yoshlarni ilmiy tadqiqot ishlariga jalb qilish, yoshlar o‘rtasida ilmiy va ijodiy hamkorlikni rivojlantirish, fikr, tajriba almashish uchun sharoit yaratish, yoshlarni ilmiy texnik rivojlanish yo‘lida birlashtirish, shuningdek, yosh olimlarning ilmiy faoliyatini qo‘llab-quvvatlash va rag‘batlantirish.
“Olmaliq KMK” AJ NM va QQ ICh IIChB — bu o‘z sohasida noyob bo‘lgan majmuaviy korxona. Volfram va molibden mahsulotlarini har xil markadagi va qotishmalardagi metall buyumlar, import o‘rnini bosuvchi va eksportga yo‘naltirilgan mahsulotlarni chiqindisiz texnologiyalar asosida chuqur qayta ishlashni amalga oshiradi.
Mehmonlarga aytilganidek, bugungi kunda korxonada 895 kishi ishlaydi, ularning deyarli 60 foizi yoshlardir. IIChB xodimlari 25 ta turli institut va universitetlarning bitiruvchilaridir.
“Bizning asosiy faoliyatimiz volfram va molibden kabi noyob metallarni, shuningdek, qattiq qotishma mahsulotlarini ishlab chiqarishdir. Biz mahalliy korxonalar uchun o‘tga chidamli mahsulotlar bo‘yicha investitsiya loyihasini amalga oshirdik. Bundan tashqari, bu yerda molibden, volfram, reniy, tellur, kadmiy kabi metallar o‘rganiladi. Biz chiqargan volfram va molibden mahsulotlarining 95 foizi Yevropa mamlakatlariga eksport qilinmoqda. Biz ishlab chiqaradigan mahsulotlar asosan, po‘lat ishlab chiqarish, kesuvchi va mashinasozlikda va harbiy sanoat uchun ishlatiladi. Mahalliy bozor uchun biz metallni qayta ishlash uchun ishlatiladigan qattiq qotishmalarni ishlab chiqaramiz”, — dedi Ulug‘bek Ro‘ziyev, “Olmaliq KMK” AJning Nodir metallar va qattiq qotishmalar ishlab chiqarish bo‘yicha ilmiy ishlab chiqarish birlashmasining ishlab chiqarish bo‘yicha direktor o‘rinbosari.
Mutaxassisning so‘zlariga ko‘ra, IIChBning so‘nggi muhim yutuqlaridan biri shundaki, mahalliylashtirish dasturiga muvofiq 2020-yilda 32 turdagi mahsulotlar, xususan, mashinasozlik uchun kesuvchi asbob uskunalar, o‘tga chidamli mahsulotlar, zirhli disklar o‘zlashtirildi. 2019-yilda bunday mahalliylashtirish loyihalari atigi uchta bo‘lgan. Bu yil yana 30 ta loyiha, jumladan, nodir metallar va qattiq qotishmalarning O‘zbekiston—Koreya ilmiy-texnologik markazi (ITM) bilan birgalikda ishlab chiqilgan o‘tga chidamli mahsulotlar, yangi qattiq qotishmalarni ishlab chiqarish rejalashtirilgan.
Ilmiy-texnologik markaz Koreyaning Kiram noyob metallar instituti bilan birgalikda 2019- yil aprel oyida ilmiy-ishlab chiqarish birlashmasi tarkibida yaratilgan. Ushbu markazda mineral xomashyoni tadqiqot qilish va boyitish laboratoriyasi, metallurgiya tadqiqotlari va yuqori toza metallar laboratoriyasi, qattiq qotishmalar, nanotexnologiyalar kompozit va istiqbolli materiallar laboratoriyasi, materiallarning tuzilishi va xususiyatlarini o‘rganish labaratoriyasi, shuningdek, eksperimental sanoat sexi mavjud.
Ilm-fan va ishlab chiqarishning o‘zaro aloqasini mazkur markaz misolida ko‘rish mumkin. Bu yerda noyob metallar va qattiq qotishmalardan yangi turdagi mahsulotlarni olish uchun ilmiy izlanishlar olib borilmoqda, natijada o‘tgan yil davomida 6 ta yangi turdagi mahsulotlarni ishlab chiqarishni o‘zlashtirishga imkon bo‘ldi.
“Markazning vazifalari qatorida ilg‘or texnologiyalarni rivojlantirish, yuqori sifatli uskunalardan foydalanish, o‘z imkoniyatlarimiz va koreyalik hamkasblarimizning imkoniyatlarini birlashtirib, O‘zbekistonda yangicha sifatdagi yangi avlod qattiq qotishmalarini rivojlantirish. Shuningdek, laboratoriyalar tegishli sohalar bo‘yicha mutaxassislarni ham tayyorlamoqda.
Ma’lumki, zavod faoliyati natijalaridan biri, bu ko‘plab qimmatbaho tarkibiy qismlar, jumladan, volfram, molibden, oltin, kumush, mis, rux, shuningdek, qator noyob elementlarini o‘z ichiga olgan sanoat chiqindilarining shakllanishidir. Shunday qilib, ushbu laboratoriyalarda koreyalik hamkasblarimiz bilan birgalikda tadqiqot ishlarini o‘tkazishni rejalashtirmoqdamiz. Qo‘shma hamkorlikning yutuqlari qatorida materiallarga yangi xususiyatlar beradigan nano kukunlar ishlab chiqarishni keltirish mumkin. Biz allaqachon ushbu nano kukunlardan tormozlovchi madsaddagi mahsulotlarni oldik”, — deydi “Olmaliq KMK” AJ NM va QQ ICh IIChB noyob metallar va qattiq qotishmalar ITM rahbari Eshmurat Pirmatov.
Ishlab chiqaruvchilar press-tur ishtirokchilarini bir qator sexlar faoliyati bilan tanishtirdi. U yerda mehmonlar bir qator ishlab chiqarish jarayonlarini kuzatishdi. Shuningdek, 28 ming kitobga ega resurs markazi va kutubxonaga tashrif buyurishdi. Aytgancha, ularning barchasi tez orada raqamlashtiriladi va texnik adabiyotlar kutubxonasining elektron katalogiga kiritiladi.
Press-tur davomida ta’lim va ishlab chiqarishni integratsiyasiga katta e’tibor berildi.
“Men shogirdlarimga marketing, menejment va masofaviy transformatsiyani o‘rgataman. O‘zbekistonga uch yil oldin kelganman. Shuni ta’kidlashni istardimki, respublikada ishlab chiqarish sohasi yetarlicha rivojlangan va bu, mening fikrimcha, mamlakatni to‘liq rivojlantirishning eng muhim yo‘nalishlardan biridir. Men Samsung kompaniyasining ishlab chiqarish bo‘yicha tajribasiga egaman hamda buni men baham ko‘rishni juda xohlayman. Bu ITMga kelishimizning sabablaridan biri. Umid qilamanki, bu bizning universitetimiz bilan OKMK o‘rtasidagi uzoq muddatli hamkorlikni yo‘lga qo‘yishda muhim bo‘ladi”, — deydi Li In Tek, Toshkent shahridagi Inha universiteti professori.
“Talabalar yonimizga kelib, o‘zining prototipini yaratishi va ularni ishlab chiqarishda tatbiq etishi mumkin. Buning uchun Innovatsion rivojlanish vazirligi tomonidan grant olish imkoniyati mavjud, venchur moliyalashtirish ko‘zda tutilgan va startap akseleratorlar xizmatlardan foydalanish mumkin. Menimcha, bu Toshkent shahridagi Inha universiteti talabalari ishtirokidagi texnologik tadbirkorlikni rivojlantirish uchun katta qadam bo‘ladi. Biz boshqa universitetlar bilan ham hamkorlikni rivojlantirmoqdamiz. Shunday qilib, Toshkent davlat texnika universiteti, Andijon mashinasozlik instituti, Moskva po‘lat va qotishmalar institutining Olmaliq filiali va boshqalar bilan aloqalar o‘rnatildi”,— deydi nodir materiallar va qattiq qotishmalar O‘zbekiston—Koreya ilmiy-texnologik markazining nanotexnologiyalar, kompozit va ilg‘or materiallar laboratoriyasi rahbari Amir Obidov.
Ma’lumotlar sheriklik huquqi asosida tayyorlandi.
Izoh (0)