«Олмалиқ КМК» АЖ томонидан Тошкент шаҳридаги Инҳа университети ўқитувчилари ва бир қатор оммавий ахборот воситалари учун илмий-таълим тизимининг инновацион ривожланишини тарғиб қилишга қаратилган пресс-тур ташкил этилди. Тадбир иштирокчилари «Олмалиқ КМК» АЖ Нодир металлар ва қаттиқ қотишмалар ишлаб чиқариш бўйича илмий ишлаб чиқариш бирлашмасига (НМ ҚҚ ИЧ ИИЧБ) ва Чирчиқ шаҳрида жойлашган Ўзбекистон—Корея илмий-технологик марказига ташриф буюришди.
Ташкилотчилар таъкидлаганидек, пресс-турнинг асосий вазифаси — олий ўқув юртларида таҳсил олаётган иқтидорли ёшларни илмий тадқиқот ишларига жалб қилиш, ёшлар ўртасида илмий ва ижодий ҳамкорликни ривожлантириш, фикр, тажриба алмашиш учун шароит яратиш, ёшларни илмий техник ривожланиш йўлида бирлаштириш, шунингдек, ёш олимларнинг илмий фаолиятини қўллаб-қувватлаш ва рағбатлантириш.
«Олмалиқ КМК» АЖ НМ ва ҚҚ ИЧ ИИЧБ — бу ўз соҳасида ноёб бўлган мажмуавий корхона. Вольфрам ва молибден маҳсулотларини ҳар хил маркадаги ва қотишмалардаги металл буюмлар, импорт ўрнини босувчи ва экспортга йўналтирилган маҳсулотларни чиқиндисиз технологиялар асосида чуқур қайта ишлашни амалга оширади.
Меҳмонларга айтилганидек, бугунги кунда корхонада 895 киши ишлайди, уларнинг деярли 60 фоизи ёшлардир. ИИЧБ ходимлари 25 та турли институт ва университетларнинг битирувчиларидир.
«Бизнинг асосий фаолиятимиз вольфрам ва молибден каби ноёб металларни, шунингдек, қаттиқ қотишма маҳсулотларини ишлаб чиқаришдир. Биз маҳаллий корхоналар учун ўтга чидамли маҳсулотлар бўйича инвестиция лойиҳасини амалга оширдик. Бундан ташқари, бу ерда молибден, вольфрам, рений, теллур, кадмий каби металлар ўрганилади. Биз чиқарган вольфрам ва молибден маҳсулотларининг 95 фоизи Европа мамлакатларига экспорт қилинмоқда. Биз ишлаб чиқарадиган маҳсулотлар асосан, пўлат ишлаб чиқариш, кесувчи ва машинасозликда ва ҳарбий саноат учун ишлатилади. Маҳаллий бозор учун биз металлни қайта ишлаш учун ишлатиладиган қаттиқ қотишмаларни ишлаб чиқарамиз», — деди Улуғбек Рўзиев, «Олмалиқ КМК» АЖнинг Нодир металлар ва қаттиқ қотишмалар ишлаб чиқариш бўйича илмий ишлаб чиқариш бирлашмасининг ишлаб чиқариш бўйича директор ўринбосари.
Мутахассиснинг сўзларига кўра, ИИЧБнинг сўнгги муҳим ютуқларидан бири шундаки, маҳаллийлаштириш дастурига мувофиқ 2020 йилда 32 турдаги маҳсулотлар, хусусан, машинасозлик учун кесувчи асбоб ускуналар, ўтга чидамли маҳсулотлар, зирҳли дисклар ўзлаштирилди. 2019 йилда бундай маҳаллийлаштириш лойиҳалари атиги учта бўлган. Бу йил яна 30 та лойиҳа, жумладан, нодир металлар ва қаттиқ қотишмаларнинг Ўзбекистон—Корея илмий-технологик маркази (ИТМ) билан биргаликда ишлаб чиқилган ўтга чидамли маҳсулотлар, янги қаттиқ қотишмаларни ишлаб чиқариш режалаштирилган.
Илмий-технологик марказ Кореянинг Kiram ноёб металлар институти билан биргаликда 2019- йил апрель ойида илмий-ишлаб чиқариш бирлашмаси таркибида яратилган. Ушбу марказда минерал хомашёни тадқиқот қилиш ва бойитиш лабораторияси, металлургия тадқиқотлари ва юқори тоза металлар лабораторияси, қаттиқ қотишмалар, нанотехнологиялар композит ва истиқболли материаллар лабораторияси, материалларнинг тузилиши ва хусусиятларини ўрганиш лабараторияси, шунингдек, экспериментал саноат цехи мавжуд.
Илм-фан ва ишлаб чиқаришнинг ўзаро алоқасини мазкур марказ мисолида кўриш мумкин. Бу ерда ноёб металлар ва қаттиқ қотишмалардан янги турдаги маҳсулотларни олиш учун илмий изланишлар олиб борилмоқда, натижада ўтган йил давомида 6 та янги турдаги маҳсулотларни ишлаб чиқаришни ўзлаштиришга имкон бўлди.
«Марказнинг вазифалари қаторида илғор технологияларни ривожлантириш, юқори сифатли ускуналардан фойдаланиш, ўз имкониятларимиз ва кореялик ҳамкасбларимизнинг имкониятларини бирлаштириб, Ўзбекистонда янгича сифатдаги янги авлод қаттиқ қотишмаларини ривожлантириш. Шунингдек, лабораториялар тегишли соҳалар бўйича мутахассисларни ҳам тайёрламоқда.
Маълумки, завод фаолияти натижаларидан бири, бу кўплаб қимматбаҳо таркибий қисмлар, жумладан, вольфрам, молибден, олтин, кумуш, мис, рух, шунингдек, қатор ноёб элементларини ўз ичига олган саноат чиқиндиларининг шаклланишидир. Шундай қилиб, ушбу лабораторияларда кореялик ҳамкасбларимиз билан биргаликда тадқиқот ишларини ўтказишни режалаштирмоқдамиз. Қўшма ҳамкорликнинг ютуқлари қаторида материалларга янги хусусиятлар берадиган нано кукунлар ишлаб чиқаришни келтириш мумкин. Биз аллақачон ушбу нано кукунлардан тормозловчи мадсаддаги маҳсулотларни олдик», — дейди «Олмалиқ КМК» АЖ НМ ва ҚҚ ИЧ ИИЧБ ноёб металлар ва қаттиқ қотишмалар ИТМ раҳбари Эшмурат Пирматов.
Ишлаб чиқарувчилар пресс-тур иштирокчиларини бир қатор цехлар фаолияти билан таништирди. У ерда меҳмонлар бир қатор ишлаб чиқариш жараёнларини кузатишди. Шунингдек, 28 минг китобга эга ресурс маркази ва кутубхонага ташриф буюришди. Айтганча, уларнинг барчаси тез орада рақамлаштирилади ва техник адабиётлар кутубхонасининг электрон каталогига киритилади.
Пресс-тур давомида таълим ва ишлаб чиқаришни интеграциясига катта эътибор берилди.
«Мен шогирдларимга маркетинг, менежмент ва масофавий трансформацияни ўргатаман. Ўзбекистонга уч йил олдин келганман. Шуни таъкидлашни истардимки, республикада ишлаб чиқариш соҳаси етарлича ривожланган ва бу, менинг фикримча, мамлакатни тўлиқ ривожлантиришнинг энг муҳим йўналишлардан биридир. Мен Samsung компаниясининг ишлаб чиқариш бўйича тажрибасига эгаман ҳамда буни мен баҳам кўришни жуда хоҳлайман. Бу ИТМга келишимизнинг сабабларидан бири. Умид қиламанки, бу бизнинг университетимиз билан ОКМК ўртасидаги узоқ муддатли ҳамкорликни йўлга қўйишда муҳим бўлади», — дейди Ли Ин Тек, Тошкент шаҳридаги Инҳа университети профессори.
«Талабалар ёнимизга келиб, ўзининг прототипини яратиши ва уларни ишлаб чиқаришда татбиқ этиши мумкин. Бунинг учун Инновацион ривожланиш вазирлиги томонидан грант олиш имконияти мавжуд, венчур молиялаштириш кўзда тутилган ва стартап акселераторлар хизматлардан фойдаланиш мумкин. Менимча, бу Тошкент шаҳридаги Инҳа университети талабалари иштирокидаги технологик тадбиркорликни ривожлантириш учун катта қадам бўлади. Биз бошқа университетлар билан ҳам ҳамкорликни ривожлантирмоқдамиз. Шундай қилиб, Тошкент давлат техника университети, Андижон машинасозлик институти, Москва пўлат ва қотишмалар институтининг Олмалиқ филиали ва бошқалар билан алоқалар ўрнатилди»,— дейди нодир материаллар ва қаттиқ қотишмалар Ўзбекистон—Корея илмий-технологик марказининг нанотехнологиялар, композит ва илғор материаллар лабораторияси раҳбари Амир Обидов.
Маълумотлар шериклик ҳуқуқи асосида тайёрланди.
Изоҳ (0)