Italiyaning Kalabriya provinsiyasidagi Ndrangeta mafiya guruhining eng ko‘p qidirilayotgan boshliqlaridan biri Barselonada hibsga olindi. Bu haqda Italiyaning ANSA agentligi xabar berdi.
35 yoshli Juzeppe Romeo Yevropaga kokain yetkazib berishda muhim rol o‘ynagan. Narkotik savdosi bilan shug‘ullangani uchun mafiya sardori 20 yilga ozodlikdan mahrum qilindi.
Italiya Tashqi ishlar vaziri Luchano Lamorjezening ta’kidlashicha, jinoyatchining qo‘lga olinishi Yevropaga eng yirik kokain yetkazib beruvchisi hisoblanuvchi Ndrangeta mafiyasiga jiddiy zarba bo‘ldi.
Yanvar oyida Italiyaning Lametsiya-Terme shahrida Ndrangeta mafiyasi a’zolarining so‘nggi 30 yil ichidagi eng yirik sud jarayoni boshlandi. Uyushgan jinoyatchilikda gumon qilingan 355 kishi, shuningdek, ular bilan til biriktirishda ayblangan mansabdor shaxslar, tadbirkorlar va advokatlar ustidan sud jarayonlari olib borildi. Ayblanuvchilarning ismlari uch soat davomida o‘qib eshittirildi.
Shuningdek fevral oyida Italiyada huquq-tartibot xodimlari tomonidan o‘tkazilgan ikkita maxsus operatsiya davomida mamlakatdagi eng qudratli Ndrangeta mafiyasining jami 45 nafar a’zosi hibsga olingan edi.
Izoh (0)