Angliyaning Uiltshir grafligi kengashi 2018-yilda Solsberida zaharlangan Rossiya Bosh razvedka boshqarmasi sobiq zobiti Sergey Skripalning uyini sotib olishga qaror qildi. Bu haqda BBC News’ga tayanib Meduza xabar berdi.
Uiltshir kengashi Solsberining Kristi-Miller-roud ko‘chasidagi mazkur uyni sotib olish to‘g‘risida qarorni hududda yashovchi mahalliy aholi bilan maslahatlashgandan so‘ng e’lon qildi. Hukumat binoni sotuvga qo‘yish uchun uni qayta qurib, ta’mirlash niyatida. Mirror gazetasining yozishicha, uyda allaqachon yangi hammom va ikkita mehmonxona qurilgan.
Uyni qo‘shma mulkchilik sxemasi bo‘yicha sotuvga qo‘yish rejalashtirilgan. Sotish shartlariga ko‘ra, bino ofis, pab yoki do‘kon sifatida emas, balki turar joy mulki sifatida ishlatilishi kerak, xonalarni yarimijarga berish mumkin emas va hech kim uyning tarixiga qarab, savdolashmasligi kerak.
“Bu uyni yana turar joy sifatida ko‘rsak, yaxshi bo‘lardi”, — dedi kengash rahbari Filip Uaytxed.
Ma’lumot uchun, Solsberi shahridagi uy — bu Buyuk Britaniya ma’muriyatining fikriga ko‘ra, Sergey Skripal va uning qizi Yuliyaning “Novichok” guruhiga kiruvchi, asab tizimini falaj qiladigan modda bilan zaharlangani yuzasidan o‘tkazilgan tekshiruvda zaharning daliliy izlari topilgan birinchi joy. Ularga qilingan suiqasddan bir yil o‘tib, 2019-yilning mart oyida Buyuk Britaniya hukumati binoni “Novichok” izlaridan butunlay tozalaganini e’lon qilgan, tozalash ishlariga ketgan vaqt 13 ming ish soatiga to‘g‘ri kelgan.
Eslatib o‘tamiz, Buyuk Britaniya foydasiga josuslikda ayblanib, sudlangan Rossiya Bosh razvedka boshqarmasi sobiq polkovnigi Sergey Skripal va uning qizi Yuliya 2018-yil 4-mart kuni Angliyaning Solsberi shahrida “Novichok” zahari bilan zaharlangan. Britaniya ma’muriyatining fikricha, suiqasd Rossiya maxsus xizmatlari tomonidan uyushtirilgan. Rossiya Skripallarning zaharlanishiga aloqadorligi bo‘yicha ayblovlarni qat’iyan rad etib keladi. Sergey va Yuliya Skripallar omon qolgan, ammo voqeadan bir necha oy o‘tgach, zaharga tasodifan yo‘liqqan mahalliy fuqaro Don Sterjess vafot etgan.
Izoh (0)