Англиянинг Уилтшир графлиги кенгаши 2018 йилда Солсберида заҳарланган Россия Бош разведка бошқармаси собиқ зобити Сергей Скрипалнинг уйини сотиб олишга қарор қилди. Бу ҳақда BBC News’га таяниб Meduza хабар берди.
Уилтшир кенгаши Солсберининг Кристи-Миллер-роуд кўчасидаги мазкур уйни сотиб олиш тўғрисида қарорни ҳудудда яшовчи маҳаллий аҳоли билан маслаҳатлашгандан сўнг эълон қилди. Ҳукумат бинони сотувга қўйиш учун уни қайта қуриб, таъмирлаш ниятида. Mirror газетасининг ёзишича, уйда аллақачон янги ҳаммом ва иккита меҳмонхона қурилган.
Уйни қўшма мулкчилик схемаси бўйича сотувга қўйиш режалаштирилган. Сотиш шартларига кўра, бино офис, паб ёки дўкон сифатида эмас, балки турар жой мулки сифатида ишлатилиши керак, хоналарни яримижарга бериш мумкин эмас ва ҳеч ким уйнинг тарихига қараб, савдолашмаслиги керак.
«Бу уйни яна турар жой сифатида кўрсак, яхши бўларди», — деди кенгаш раҳбари Филип Уайтхед.
Маълумот учун, Солсбери шаҳридаги уй — бу Буюк Британия маъмуриятининг фикрига кўра, Сергей Скрипал ва унинг қизи Юлиянинг «Новичок» гуруҳига кирувчи, асаб тизимини фалаж қиладиган модда билан заҳарлангани юзасидан ўтказилган текширувда заҳарнинг далилий излари топилган биринчи жой. Уларга қилинган суиқасддан бир йил ўтиб, 2019 йилнинг март ойида Буюк Британия ҳукумати бинони «Новичок» изларидан бутунлай тозалаганини эълон қилган, тозалаш ишларига кетган вақт 13 минг иш соатига тўғри келган.
Эслатиб ўтамиз, Буюк Британия фойдасига жосусликда айбланиб, судланган Россия Бош разведка бошқармаси собиқ полковниги Сергей Скрипал ва унинг қизи Юлия 2018 йил 4 март куни Англиянинг Солсбери шаҳрида «Новичок» заҳари билан заҳарланган. Британия маъмуриятининг фикрича, суиқасд Россия махсус хизматлари томонидан уюштирилган. Россия Скрипалларнинг заҳарланишига алоқадорлиги бўйича айбловларни қатъиян рад этиб келади. Сергей ва Юлия Скрипаллар омон қолган, аммо воқеадан бир неча ой ўтгач, заҳарга тасодифан йўлиққан маҳаллий фуқаро Дон Стержесс вафот этган.
Изоҳ (0)