Fukusima AESdagi avariyadan keyin 10 yil o‘tdi. Falokat zonasi hozir qanday holatda? (foto)
Roppa-rosa o‘n yil oldin Yaponiyada 20 ming kishining hayotiga zomin bo‘lgan ulkan falokat yuz berdi. Qariyb 9 ballik zilzila ortidan kelib chiqqan sunami Fukusima atom elektr stansiyasini ishdan chiqardi. Oqibatda xavfli radiatsiya tarqalib, inson hayoti va atrof-muhitga tahdid sola boshladi va stansiya atrofidagi 160 mingdan ziyod aholi o‘z uyini tark etishga majbur bo‘ldi. Yaponiya hukumatining Fukusimadagi hayotni qayta tiklashga bo‘lgan sa’y-harakatlariga qaramay, aksariyat mahalliy aholi radioaktiv ta’sir xavfi va infratuzilmaning yetishmasligi sababli xaroba hududlarga qaytishni istamayapti. Falokat zonasining bugungi kundagi ahvoli haqida “RBK” fotoreportaj tayyorladi.
Sakae Kato 2011-yil mart oyida sodir bo‘lgan fojiadan so‘ng Fukusima prefekturasining Namie posilkasidagi uyini tashlab ketishdan bosh tortdi. Mana o‘n yildan buyon u yopiq zonada yashab, tashlab ketilgan mushuklarga g‘amxo‘rlik qilib keladi.Foto: Reuters
O‘n yil davomida Kato 23 ta mushukni tuproqqa ko‘mgan va hozirda uning qo‘lida 41 ta mushuk bor. Shuningdek, u bir itni qutqarib qolgan va yovvoyi hayvonlarni ham boqdi.Foto: Reuters
57 yoshli Kato tabiiy ofatdan oldin kichik qurilish kompaniyasiga ega edi. U egasiz uylarda tashlab ketilayotgan va o‘layotgan uy hayvonlarini ko‘rgach, 160 ming kishi tark etgan xavfli zonada qolishga qaror qildi.Foto: Reuters
Kato yashayotgan joy uch avlod davomida uning oilasiga tegishli bo‘lgan. “Men ketishni istamayman, menga bu tog‘larda yashash yoqadi”, — deydi uFoto: Reuters
Fojiadan keyin evakuatsiya amalga oshirilgan hududlarda aloqa uzilgan. Katoning uyida suv yo‘q, shuning uchun u xavfli zona tashqarisidagi jamoat hojatxonalaridan suv tashib kelishga majbur.Foto: Reuters
Kato tashlab ketilgan mushuklarni tutish va qutqarish uchun foydalanadigan o‘lja solingan kosani ushlab turibdi.Foto: Reuters
Katoning so‘zlariga ko‘ra, hayvonlarga oziq-ovqat olish uchun oyiga, taxminan, 7000 dollar pul ketadi.Foto: Reuters
Sakae Kato yovvoyi cho‘chqalarni ham boqadi. Odamlar tashlab ketgan hududlarda ularning soni ko‘paymoqda. Mahalliy hokimiyat Katoning odamlar uchun xavfli bo‘lishi mumkin bo‘lgan yovvoyi cho‘chqalarni parvarish qilayotganidan norozi. 25-fevral kuni Kato cho‘chqani tuzoqdan ozod qilgani uchun hibsga olingan.Foto: Reuters
Xisae Unuma fevral oyida Fukusima prefekturasidagi Futaba posyolkasida qolgan o‘zining tashlandiq uyiga tashrif buyurgan edi. Uning uyi AESdan 2,5 km uzoqlikda joylashgan. Uy o‘n yil oldingi zilzilaga dosh bergan, ammo hozir qulab tushay deb turibdi. “U haliyam tik turganiga hayronman”, — dedi 67 yoshli fermer.Foto: Reuters
Fukusima Chernobildan keyingi eng dahshatli yadro halokati bo‘ldi. Tabiiy ofatdan keyin 1150 kvadrat kilometr hudud zararlangan. Ushbu hudud tarkibiga 11 ta shahar va ko‘plab qishloqlar kiradi. 20 ming odam fojia qurboniga aylandi va prefekturaning 160 mingdan ortiq aholisi o‘z uylarini tark etdi.Foto: Reuters
Tabiiy ofatdan keyin Unumaga tegishli 50 sigirdan faqat bittasi omon qolgan. Sigir Unuma va uning o‘tgan hayotini bog‘lab turgan so‘nggi nishonaga aylandi.Foto: Reuters
Unuma hozirda Tokio yaqinidagi Saytama prefekturasida sabzavot yetishtiradi. 3 yil oldin Saytamada uning eri vafot etgan. Ayolning aytishicha, hukumat uning dalalaridan radioaktiv tuproqni qirib tashlagan taqdirda ham Futabaga qaytmaydi.Foto: Reuters
Uning eski uyi atrofidagi radiatsiya darajasi Tokiodagi nurlanish darajasidan, taxminan, 20 baravar yuqori.Foto: Reuters
Tokio Olimpiadasiga tayyorgarlik ko‘rish jarayonida Fukusimani milliy tiklanish ramziga aylantirgan hukumat aholini zararsizlangan hududga qaytishga chaqirmoqda. Biroq ko‘pchilik haliyam atom elektr stantsiyasi, yangi zilzilalar xavfi, ish joylari va sifatli infratuzilmaning yetishmasligidan xavotirlanmoqda.Foto: Reuters
Izoh (0)