Shavkat Mirziyoyev 11-mart kuni Abu-Dabi amirligi valiahdi, Birlashgan Arab Amirliklari Qurolli kuchlari oliy bosh qo‘mondoni o‘rinbosari Shayx Muhammad bin Zoid al-Nahayon bilan telefon orqali muloqot qildi.
Prezident matbuot xizmatining xabar berishicha, suhbat avvalida davlat rahbari Abu-Dabi valiahdini tavallud kuni bilan tabriklab, do‘st amirliklar xalqiga farovonlik, muvaffaqiyatlar va ravnaq tilagan.
Muloqot chog‘ida mamlakatlar o‘rtasidagi ko‘p qirrali hamkorlikni yanada kengaytirish masalalari muhokama qilingan.
2019-yil mart oyida Birlashgan Arab Amirliklariga amalga oshirilgan oliy darajadagi tashrifda erishilgan kelishuvlarni ro‘yobga chiqarishga alohida e’tibor qaratilgan.
Suhbat davomida energetika, sanoat, qishloq xo‘jaligi, moliya, infratuzilma yo‘nalishlarida yirik qo‘shma loyihalarni, sog‘liqni saqlash va ta’lim sohalaridagi qator muhim dasturlarni amalga oshirishni davom ettirish muhim ekan ta’kidlangan. Shuningdek, xalqaro va mintaqaviy ahamiyatga ega masalalar yuzasidan ham fikr almashilgan.
Ma’lumot uchun, Shayx Muhammad bin Zoid al-Nahayon 1961-yil 11-mart kuni tavallud topgan. 2021-yilda u 60 yoshga to‘ldi.
Shavkat Mirziyoyev 2021-yilning 26-fevralida 67 yoshga to‘lgan Turkiya prezidenti Rajab Toyyib Erdo‘g‘onni tug‘ilgan kuni bilan tabriklagandi.
Izoh (0)