Prezident Shavkat Mirziyoyevning taklifiga binoan Qirg‘iziston prezidenti Sadir Japarov 11-mart kuni davlat tashrifi bilan O‘zbekistonga keldi, deb xabar beradi O‘zA.
Ta’kidlanishicha, Islom Karimov nomidagi Toshkent xalqaro aeroportida oliy martabali mehmonni bosh vazir Abdulla Aripov kutib olgan.
Ma’lum qilinishicha, 11-mart kuni Ko‘ksaroy qarorgohida ikki mamlakat yetakchilari O‘zbekiston–Qirg‘iziston do‘stlik, yaxshi qo‘shnichilik va strategik sheriklik munosabatlarini yanada rivojlantirish va mustahkamlash masalalarining barcha yo‘nalishlarini ko‘rib chiqishi kutilmoqda.
Davlat rahbarlari uchrashuvi kun tartibidan konstruktiv siyosiy muloqotni davom ettirish, savdo, sanoat, transport, energetika, qishloq va suv xo‘jaligi sohalarida ko‘p qirrali hamkorlikni kengaytirish, parlamentlararo va hududlararo aloqalarni faollashtirish o‘rin olgan.
Eslatib o‘tamiz, 22-fevral kuni Qirg‘iziston tashqi ishlar vazirining birinchi o‘rinbosari Nuran Niyozaliyev va O‘zbekiston tashqi ishlar vazirining birinchi o‘rinbosari Farhod Arziyev ishtirokidagi videokonferensaloqada tashrifga tayyorgarlik ko‘rish va uni o‘tkazish masalalari muhokama qilingandi. 27-fevral kuni Abdulaziz Komilov Qirg‘iziston prezidenti Sadir Japarov bilan uchrashib, unga Shavkat Mirziyoyev maktubini topshirgandi.
Ma’lumot uchun, Sadir Japarov Qirg‘iziston prezidenti sifatidagi ilk chet el safarini 24—25-fevral kunlari Rossiyaga amalga oshirgan.
Izoh (0)