Шавкат Мирзиёев 11 март куни Абу-Даби амирлиги валиаҳди, Бирлашган Араб Амирликлари Қуролли кучлари олий бош қўмондони ўринбосари Шайх Муҳаммад бин Зоид ал-Наҳаён билан телефон орқали мулоқот қилди.
Президент матбуот хизматининг хабар беришича, суҳбат аввалида давлат раҳбари Абу-Даби валиаҳдини таваллуд куни билан табриклаб, дўст амирликлар халқига фаровонлик, муваффақиятлар ва равнақ тилаган.
Мулоқот чоғида мамлакатлар ўртасидаги кўп қиррали ҳамкорликни янада кенгайтириш масалалари муҳокама қилинган.
2019 йил март ойида Бирлашган Араб Амирликларига амалга оширилган олий даражадаги ташрифда эришилган келишувларни рўёбга чиқаришга алоҳида эътибор қаратилган.
Суҳбат давомида энергетика, саноат, қишлоқ хўжалиги, молия, инфратузилма йўналишларида йирик қўшма лойиҳаларни, соғлиқни сақлаш ва таълим соҳаларидаги қатор муҳим дастурларни амалга оширишни давом эттириш муҳим экан таъкидланган. Шунингдек, халқаро ва минтақавий аҳамиятга эга масалалар юзасидан ҳам фикр алмашилган.
Маълумот учун, Шайх Муҳаммад бин Зоид ал-Наҳаён 1961 йил 11 март куни таваллуд топган. 2021 йилда у 60 ёшга тўлди.
Шавкат Мирзиёев 2021 йилнинг 26 февралида 67 ёшга тўлган Туркия президенти Ражаб Тоййиб Эрдўғонни туғилган куни билан табриклаганди.
Изоҳ (0)