Andijon viloyati Xonobod shahrida 21 yoshli ayolga zo‘rlik ishlatib, uning telefonini o‘g‘irlab ketgan 19 yoshli yigit ushlandi deya xabar qilmoqda Tergov departamenti.
Qayd etilishicha, 2021-yilning 21-fevral kuni soat 03:00 larda 19 yoshli A.G‘. o‘zganing mulkini ochiqdan ochiq talon-toroj qilish maqsadida Xonobod shahridagi “Bunyodkor” mahallasi hududida o‘zining tanishi 21 yoshli S.Q.ga nisbatan hayoti uchun xavfli bo‘lmagan zo‘rlik ishlatib, uni tahqirlab, haqorat qilib, qaychi bilan sochlarini qirqib tashlagan.
Keyin u jabrlanuvchining narxi 1 350 000 so‘m bo‘lgan Samsung A 10S rusumli telefonini talonchilik yo‘li bilan qo‘lga kiritib, hodisa joyidan yashiringan.
Olib borilgan tergovga qadar tekshiruv harakatlari davomida A.G‘.dan uyali telefon apparati ashyoviy dalil tariqasida rasmiylashtirib olingan.
Mazkur holat yuzasidan Xonobod shahar IIB huzuridagi tergov guruhi tomonidan A.G‘.ga nisbatan Jinoyat kodeksining 166-moddasi 1-qismi (talonchilik) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Hozirda tergov davom etmoqda, deyiladi xabarda.
Bundan avval Farg‘onada o‘zganing uyidan 5000 rubl va 7 million so‘mga yaqin pullarni o‘g‘irlagani aniqlangani, Samarqandda “romantik oqshom” uchun chaqirilgan qizlar o‘smirning uyini to‘nab ketgani hamda Toshkentda sevgan qiziga narsa olib berish uchun telefon o‘g‘irlagan yigit ushlangani haqida xabar berilgandi.
Izoh (0)