2021-yil boshidan buyon IIVning Moliyalashtirish va moddiy-texnika ta’minoti bosh boshqarmasi tomonidan davlat xaridlari doirasida 48,5 milliard so‘mdan ortiq pul mablag‘lari evaziga avtomobillar va texnika sotib olish bo‘yicha bir qator shartnomalar tuzildi. Bunga “Gazeta.uz” e’tibor qaratdi.
Qayd etilishicha, 5-mart kuni IIV Kran va Maxsus Texnikalari MChJ bilan GAZon NEXT shassisiga ega maxsus 50 ta maxsus kontingentlarni tashuvchi (avtozak) transport vositasini sotib olish to‘g‘risida shartnoma imzoladi. Shartnoma summasi 23,96 milliard so‘mni tashkil etdi (bitta avtozak 479,2 million so‘m turadi).
Bundan tashqari, 15-fevraldagi shartnomaga muvofiq, IIV UzAuto Trailer’dan 4×4 g‘ildirakli formulaga ega 16 ta “KamAZ” (4326−1053−15) avtofurgonini sotib oldi. Shartnoma 9,77 milliard so‘mni tashkil etdi (bitta furgon narxi 610,6 million so‘m).
Yana bitta davlat xaridi — maxsus kontingentlarni tashuvchi 50 ta Isuzu NQR71 PL yuk mashinasi. Shartnoma 26,45 milliard so‘mga teng bo‘ldi (bitta yuk mashinasining narxi 529 million so‘m).
IIVning Moliyalashtirish va moddiy-texnika ta’minoti bosh boshqarmasi 16-fevraldagi shartnoma asosida, shuningdek, Samarqand avtomobil zavodi dileridan 30 dona SAZ NP 26 avtobusini 11 milliard so‘mga (bittasi uchun 368 million so‘m) sotib oldi. Shuningdek, 23,6 milliard so‘mga (bittasi uchun 358 million so‘m) xuddi shunday avtobuslarning o‘rindiqsiz turidan 66 ta sotib olingan.
25-fevral kuni IIV 11 milliard so‘m evaziga qo‘shimcha 30 ta SAZ NP 26 avtobusini sotib oldi.
26-fevraldagi shartnomaga ko‘ra, IIV 3,74 milliard so‘mga kinologlar uchun 51 ta Damas-2 D84 avtomobilini (bittasi uchun 73,5 million so‘m) sotib oldi.
IIVning Moliyalashtirish va moddiy-texnika ta’minoti bosh boshqarmasining ma’lum qilishicha, ayrim shartnomalar, xususan, 26,45 milliard so‘mga 50 ta Isuzu NQR71 PL yuk mashinasi va 11 milliard so‘mga 30 dona SAZ NP 26 avtobusini sotib olish shartnomasi qayta ko‘rib chiqilishi yoki bekor qilinishi mumkin.
Izoh (0)