Farg‘onada o‘zganing uyidan 5000 rubl va 7 mln so‘mga yaqin pullarni o‘g‘irlagan ayol bu pullarga ko‘rpacha sotib olgani aniqlandi

Farg‘onada ayol kishi o‘zganing uyiga g‘ayriqonuniy ravishda kirib, uydan katta miqdorda pullarni o‘g‘irlab ketdi, deya xabar qilmoqda IIV.

Ma’lum qilinishicha, 1-mart kuni “Solijonobod” MFY hududida yashovchi A.A. IIBga murojaat qilib, unda 2020-yilning fevral oyida noma’lum shaxs yashash xonadoniga g‘ayriqonuniy ravishda kirib, xonadon mehmonxonasidagi sandiq ichidan 500 AQSh dollari, 5000 Rossiya rubli va 6 750 000 so‘m pullarini yashirin ravishda talon-toroj qilib, hodisa joyidan yashiringanligini ma’lum qilgan.

Mazkur holat yuzasidan Qo‘shtepa tumani IIB huzuridagi tergov bo‘limi tomonidan Jinoyat kodeksining 169-moddasi 2-qismi “g” bandi (uy-joyga kirib sodir etilgan o‘g‘rilik) bilan jinoyat ishi qo‘zg‘atilgan.

Olib borilgan tezkor-qidiruv tadbirlari davomida mazkur jinoyatni Q.S. ismli ayol sodir etganligi aniqlanib, u tomonidan jinoiy yo‘l bilan qo‘lga kiritgan pullar hisobidan sotib olingan 6 dona baxmal yakandoz ko‘rpachalari daliliy ashyo tariqasida olingan, hozirda tergov harakatlari olib borilmoqda.

Qonunchilikka asosan Jinoyat kodeksining 169-moddasi 2-qismida ko‘rsatilgan jinoyatni sodir etgan shaxs besh yilgacha ozodlikdan mahrum qilish bilan jazolanishi mumkin.

Bundan avval Samarqandda “romantik oqshom” uchun chaqirilgan qizlar o‘smirning uyini to‘nab ketgani, Namanganda o‘z ishxonasining 15 mln so‘mlik darvozasini o‘g‘irlagan qorovul qo‘lga olingani hamda Samarqandda ijarachi yigit o‘zi yashab kelgan xonadon egasining mashinasini olib qochib, YTHga uchragani haqida xabar berilgandi.