2021 йил бошидан буён ИИВнинг Молиялаштириш ва моддий-техника таъминоти бош бошқармаси томонидан давлат харидлари доирасида 48,5 миллиард сўмдан ортиқ пул маблағлари эвазига автомобиллар ва техника сотиб олиш бўйича бир қатор шартномалар тузилди. Бунга «Gazeta.uz» эътибор қаратди.
Қайд этилишича, 5 март куни ИИВ Kran va Maxsus Texnikalari МЧЖ билан ГАЗон NEXT шассисига эга махсус 50 та махсус контингентларни ташувчи (автозак) транспорт воситасини сотиб олиш тўғрисида шартнома имзолади. Шартнома суммаси 23,96 миллиард сўмни ташкил этди (битта автозак 479,2 миллион сўм туради).
Бундан ташқари, 15 февралдаги шартномага мувофиқ, ИИВ UzAuto Trailer’дан 4×4 ғилдиракли формулага эга 16 та «КамАЗ» (4326−1053−15) автофургонини сотиб олди. Шартнома 9,77 миллиард сўмни ташкил этди (битта фургон нархи 610,6 миллион сўм).
Яна битта давлат хариди — махсус контингентларни ташувчи 50 та Isuzu NQR71 PL юк машинаси. Шартнома 26,45 миллиард сўмга тенг бўлди (битта юк машинасининг нархи 529 миллион сўм).
ИИВнинг Молиялаштириш ва моддий-техника таъминоти бош бошқармаси 16 февралдаги шартнома асосида, шунингдек, Самарқанд автомобиль заводи дилеридан 30 дона SAZ NP 26 автобусини 11 миллиард сўмга (биттаси учун 368 миллион сўм) сотиб олди. Шунингдек, 23,6 миллиард сўмга (биттаси учун 358 миллион сўм) худди шундай автобусларнинг ўриндиқсиз туридан 66 та сотиб олинган.
25 февраль куни ИИВ 11 миллиард сўм эвазига қўшимча 30 та SAZ NP 26 автобусини сотиб олди.
26 февралдаги шартномага кўра, ИИВ 3,74 миллиард сўмга кинологлар учун 51 та Damas-2 Д84 автомобилини (биттаси учун 73,5 миллион сўм) сотиб олди.
ИИВнинг Молиялаштириш ва моддий-техника таъминоти бош бошқармасининг маълум қилишича, айрим шартномалар, хусусан, 26,45 миллиард сўмга 50 та Isuzu NQR71 PL юк машинаси ва 11 миллиард сўмга 30 дона SAZ NP 26 автобусини сотиб олиш шартномаси қайта кўриб чиқилиши ёки бекор қилиниши мумкин.
Изоҳ (0)