Armaniston prezidenti bosh vazir Nikol Pashinyan tomonidan taklif qilingan Bosh shtabi boshlig‘i Onik Gasparyan iste’fosi haqidagi farmon loyihasini ikki marta rad etgach, Bosh shtab boshlig‘i qonuniy tartibda lavozimidan ozod etildi. Farmon hukumat veb-saytida e’lon qilindi, deb yozadi “RBK”.
“Armaniston Respublikasi Qurolli Kuchlari Bosh shtabi boshlig‘i Onik Gasparyan 2021-yil 10-martdan qonuniy ravishda o‘z lavozimidan ozod etildi”, — deyiladi xabarda.
Farmon e’lon qilingandan so‘ng mamlakat rahbari Armen Sarkisyan Konstitutsiyaviy sudga murojaat qilib, undan 2018-yilda kiritilgan “Harbiy xizmat va harbiy xizmatchilarning maqomi to‘g‘risida”gi qonunga kiritilgan o‘zgartirishlarning konstitutsiyaga muvofiqligini tekshirishni so‘ragan.
“Murojaat yo‘llash ushbu qonunning huquqiy amaliyotida mavjud bo‘lgan muammolari bilan ham bog‘liq bo‘lib, mazkur muammolar bosh vazirning respublika Qurolli Kuchlari Bosh shtabi boshlig‘i Onik Gasparyanni lavozimidan ozod etish tashabbusi hamda undan keyingi konstitutsiyaviy va huquqiy jarayonlar natijasida yanada ravshanroq bo‘ldi”, — deyiladi davlat rahbari bayonotida.
Avvalroq Bosh shtab Armaniston Konstitutsiyasiga binoan sud Bosh shtab boshlig‘ining iste’foga chiqishi masalasini hal qila olmasligini bildirgan. Buni ma’qullamagan prezident Qurolli Kuchlarning kadrlar masalasini tartibga soluvchi qonun-qoidalariga e’tiroz bildirishga qaror qilgan edi.
Ma’lumot uchun, Tog‘li Qorabog‘dagi urushda mag‘lubiyatga uchragach, Armanistonda siyosiy inqiroz davom etmoqda. U 25-fevral kuni Bosh shtab Nikol Pashinyanning iste’fosini talab qilganidan keyin kuchaydi. Bunga bosh vazir uning Rossiya tomonidan ishlab chiqarilgan “Iskander” raketalari Qorabog‘da samara bermagani haqidagi gaplarini tanqid qilgan Bosh shtab boshlig‘i o‘rinbosarini ishdan bo‘shatgani sabab bo‘ldi.
Pashinyan unga “Iskander” raketalari haqida noto‘g‘ri ma’lumot berilganini tan oldi. Shu bilan birga, u harbiylarning xatti-harakatlarini davlat to‘ntarishiga urinish deb atadi va Bosh shtab boshlig‘ini ishdan bo‘shatishga urindi, ammo Armaniston prezidenti uni iste’foga chiqarishdan bosh tortdi. Pashinyan Bosh shtab rahbarini “xoin” deb atab, uning ketishini talab qilishda davom etdi. Yerevanda 25-fevraldan bosh vazir tarafdorlari va unga qarshi bo‘lganlarning aksiyalari bo‘lib o‘tdi.
Izoh (0)