Rossiya hududida 10-martdan boshlab Twitter’ning ishlash tezligi pasaydi, bunga tarmoqning o‘z tarkibidan noqonuniy kontentlarni olib tashlamagani sabab bo‘lmoqda, deb yozadi Meduza. Shuningdek, Rossiya OAVni nazorat qiluvchi federal xizmati (“Roskomnadzor”) agar Twitter mamlakat qonunchiligini e’tiborsiz qoldirishda davom etsa, Rossiyada tarmoqning bloklanishiga ruxsat beradi.
“Rossiya fuqarolarining xavfsizligini saqlash va internet-servisni Rossiya Federatsiyasi hududida qonun hujjatlariga amal qilishga majburlash maqsadida Twitter’ga nisbatan 2021-yil 10-martdan boshlab markazlashtirilgan javob choralari ko‘rildi, ya’ni ‘tartibga solish qoidalariga muvofiq’ tarmoq tezligi pasaytiriladi”, — deyiladi xabarda.
Tezlikni pasaytirish mobil qurilmalarning 100 foizida va statsionar qurilmalarning 50 foizida amalga oshiriladi. Vazirlikning qo‘shimcha qilishicha, agar Twitter Rossiya qonunchiligi talablarini e’tiborsiz qoldirishda davom etsa, u holda “ta’sir choralarining davomiyligi bloklashgacha boradi”.
“Roskomnadzor” xabariga ko‘ra, 2017-yildan buyon ijtimoiy tarmoqda regulyatorning talabiga qaramasdan “voyaga yetmaganlarni o‘z joniga qasd qilishga undovchi kontent, tarkibida bolalar pornografiyasi, shuningdek, giyohvand moddalarni iste’mol qilish to‘g‘risidagi ma’lumotlar” olib tashlanmagan. Shu vaqt ichida “Roskomnadzor” Twitter’ga 28 mingdan ortiq shikoyat yuborgan, ammo taqiqlangan ma’lumotlardan iborat 3168 ta material haligacha o‘chirilmagan.
Bunga eng so‘nggi yorqin misol sifatida 2021-yil 3-martda voyaga yetmaganlarni ommaviy o‘z joniga qasd qilishga chaqiriqlarini olib tashlash to‘g‘risidagi regulyatorning talablarini boshqa ijtimoiy tarmoqlardan farqli o‘laroq, Twitter namoyishkorona ravishda e’tiborsiz qoldirgani ko‘rsatilmoqda.
5-mart kuni “Roskomnadzor” o‘spirinlarning noqonuniy xatti-harakatlarga aloqador bo‘lgan ma’lumotlarni o‘chirmagani uchun bir nechta ijtimoiy tarmoqlarga, shu jumladan, Twitter’ga qarshi protokol tuzganini ma’lum qilgan. Bunday tarkibni olib tashlamaganligi uchun Odnoklassniki ijtimoiy tarmog‘i to‘rt million rubl (53 676 dollar), “VKontakte” esa bir yarim million rubl (20179 dollar) miqdorida jarimaga tortilgan.
Avvalroq TikTok o‘z joniga qasd qilishni targ‘ib qiluvchi videoroliklarni bloklayotganini ma’lum qilgan edi. 2-mart kuni Rossiyaning bir qator shaharlarida, shu jumladan, Moskvada maktab ma’muriyati ota-onalarga ijtimoiy tarmoqlarda o‘spirinlarning o‘z joniga qasd qilishiga chaqiruvchi videoroliklar paydo bo‘layotgani to‘g‘risida ogohlantiruvchi xabarlar yuborgan. “Roskomnadzor” tomonidan TikTok’da bunday videoroliklarning tarqalgani tasdiqlandi va kuzatuvchi organlarning aralashuvidan so‘ng ijtimoiy tarmoq ushbu kontentlarni tarmoqdan olib tashlagan.
Izoh (0)