Арманистон президенти бош вазир Никол Пашинян томонидан таклиф қилинган Бош штаби бошлиғи Оник Гаспарян истеъфоси ҳақидаги фармон лойиҳасини икки марта рад этгач, Бош штаб бошлиғи қонуний тартибда лавозимидан озод этилди. Фармон ҳукумат веб-сайтида эълон қилинди, деб ёзади «РБК».
«Арманистон Республикаси Қуролли Кучлари Бош штаби бошлиғи Оник Гаспарян 2021 йил 10 мартдан қонуний равишда ўз лавозимидан озод этилди», — дейилади хабарда.
Фармон эълон қилингандан сўнг мамлакат раҳбари Армен Саркисян Конституциявий судга мурожаат қилиб, ундан 2018 йилда киритилган «Ҳарбий хизмат ва ҳарбий хизматчиларнинг мақоми тўғрисида»ги қонунга киритилган ўзгартиришларнинг конституцияга мувофиқлигини текширишни сўраган.
«Мурожаат йўллаш ушбу қонуннинг ҳуқуқий амалиётида мавжуд бўлган муаммолари билан ҳам боғлиқ бўлиб, мазкур муаммолар бош вазирнинг республика Қуролли Кучлари Бош штаби бошлиғи Оник Гаспарянни лавозимидан озод этиш ташаббуси ҳамда ундан кейинги конституциявий ва ҳуқуқий жараёнлар натижасида янада равшанроқ бўлди», — дейилади давлат раҳбари баёнотида.
Аввалроқ Бош штаб Арманистон Конституциясига биноан суд Бош штаб бошлиғининг истеъфога чиқиши масаласини ҳал қила олмаслигини билдирган. Буни маъқулламаган президент Қуролли Кучларнинг кадрлар масаласини тартибга солувчи қонун-қоидаларига эътироз билдиришга қарор қилган эди.
Маълумот учун, Тоғли Қорабоғдаги урушда мағлубиятга учрагач, Арманистонда сиёсий инқироз давом этмоқда. У 25 февраль куни Бош штаб Никол Пашиняннинг истеъфосини талаб қилганидан кейин кучайди. Бунга бош вазир унинг Россия томонидан ишлаб чиқарилган «Искандер» ракеталари Қорабоғда самара бермагани ҳақидаги гапларини танқид қилган Бош штаб бошлиғи ўринбосарини ишдан бўшатгани сабаб бўлди.
Пашинян унга «Искандер» ракеталари ҳақида нотўғри маълумот берилганини тан олди. Шу билан бирга, у ҳарбийларнинг хатти-ҳаракатларини давлат тўнтаришига уриниш деб атади ва Бош штаб бошлиғини ишдан бўшатишга уринди, аммо Арманистон президенти уни истеъфога чиқаришдан бош тортди. Пашинян Бош штаб раҳбарини «хоин» деб атаб, унинг кетишини талаб қилишда давом этди. Ереванда 25 февралдан бош вазир тарафдорлари ва унга қарши бўлганларнинг акциялари бўлиб ўтди.
Изоҳ (0)