ЮНИСЕФ Ўзбекистонда қизларнинг таълим олишига инвестиция киритишга чақирди

БМТнинг Болалар фонди (ЮНИСЕФ) қизларнинг таълим олиши, маълумот олиш имкониятини, салоҳиятини ошириш, ёш аёлларга эса иш билан таъминланишда тенг имкониятлар яратиш ҳамда уларнинг ҳуқуқ ва имкониятларини кенгайтиришга инвестиция киритишга чақирди. Бу ҳақда фонднинг Тошкентдаги ваколатхонаси пресс-релизида айтилган, деб ёзмоқда «Gazeta.uz».

Жорий йилги Халқаро хотин-қизлар кунига бағишланган «Аёллар раҳбарлик лавозимларида: COVID-19 дунёсида тенг келажакка эришиш» мавзуси қизлар ва аёлларнинг барча соҳаларда тенг иштирокини таъминлашда кучларни бирлаштиришга қаратилган.

Декабрь ойида чоп этилган «Ўзбекистон ёшлари: чақириқлар ва истиқболлар» мавзусидаги ҳисобот (ЮНИСЕФ, «Юксалиш» умуммиллий ҳаракати ва Ёшлар иттифоқи ҳамкорлигида тайёрланган) маълумотларига кўра, олий таълим муассасаларидаги қизлар сони барча талабаларнинг 37 фоизини ташкил қилади. Бандлик соҳасида ёш аёллар меҳнат бозоридан сезиларли даражада четлатилган.

Агар ўрта мактабни тугатгандан сўнг 19-24 яшар ёшларнинг 56 фоизи ўқиш, иш ёки касбий тайёргарлик билан қамраб олинмаган (NEET) бўлса, аёллар учун NEET (Not in Education, Employment or Training) даражаси 18 ёшга тўлгандан сўнг тез ўсиб боради (1,7 фоиздан 69 фоизгача). 25-30 ёшли аёлларда у 74 фоизга етади, эркакларда эса у одатда пастлигича қолади (кўпи билан 33,5 фоиз) ва ёш ўтган сари пасаяди.

Тадқиқотлар кам таъминланган оилалардаги қизларнинг ижтимоий ҳимоясини кучайтириш ва олий маълумот олиш учун имтиёзли кредитлар олишни қўллаб-қувватлаш муҳим аҳамиятга эгалигини, ўрта муддатли истиқболда янада барқарор ва мустаҳкам жамиятлар шаклланишига ёрдам беришини кўрсатган.

ЮНИСЕФ давлат ташкилотлари, нодавлат нотижорат ташкилотлари ва ҳамжамиятларни аёлларнинг олий маълумот олиш ҳамда ишга кириш имкониятларидан тенг фойдаланишни таъминлайдиган платформаларни кенгайтиришга чақирган ва қуйидагиларни амалга оширишни тавсия этган:

• Ёш аёлларга алоҳида эътибор берган ҳолда ҳаётий, техник, инновацион ва тадбиркорлик кўникмаларга эга бўлишлари учун расмий ва норасмий таълимни кучайтириш.
• Хотин-қизларнинг иқтисодий, сиёсий ва жамоат соҳаларидаги фаол иштирокини қўллаб-қувватлаш.
• Қизларни ёш турмушга бериш ва олий маълумот олишга тўсқинлик қилиш сингари салбий ижтимоий меъёрларга барҳам беришга қаратилган кампанияларни ўтказиш.