Hyundai Ioniq 5’ning taqdimotidan bir necha kun o‘tib Yevropada 236 mingdan ortiq odam modelga qiziqish bildirgan. Bu haqda Janubiy Koreya brendining matbuot xizmatiga tayanib, Motor xabar berdi. Bundan tashqari, cheklangan miqdordagi Ioniq 5 Project 45’ning butun tiraji buyurtmalarni qabul qilish boshlanganidan 24 soat o‘tib, to‘liq bronlangan.
Hyundai’ning va’da qilishicha, yevropaliklar elektrokarlar uchun amalga oshirilgan oldindan buyurtmalarni uzoq kutmaydi — yetkazib berish ishlari 2021-yilning ikkinchi choragidan boshlanadi. Ioniq 5 muvaffaqiyati bir nechta omillar bilan bog‘lanmoqda: birinchidan, yangilik mashhur ixcham krossoverlar segmentiga kiradi, ikkinchidan, u zamonaviy retro uslubda yaratilgan va transformer-salonga ega, uchinchidan, elektromobilda 800 voltli quvvatlanish funksiyasi mavjud.
Hozircha elektromobilni ikki xil modifikatsiyada xarid qilish mumkin: Standart Range va Long Range — orqa va to‘liq uzatmali. Modellarning dvigateli 170-306 ot kuchini taqdim etishga qodir, bir marta quvvatlanish orqali mashinalar 480 kilometr yo‘l bosa oladi. Yevropada eng arzon Ioniq 5 modeli 41,9 ming dollardan sotuvga chiqqan.
Janubiy Koreyaning o‘zida ham modelga talab juda yuqori. Bir sutka davomida mahalliy bozorda rekord darajadagi oldindan buyurtmalar amalga oshirilgan: Ioniq 5 uchun 23 mingdan ortiq buyurtma rasmiylashtirilgan. Bu oltinchi avlod Hyundai Grandeur tomonidan o‘rnatilgan rekorddan ko‘p demak.
Avvalroq internetda Hyundai Ioniq 5 seriyali elektrokrossoveri prototipining yangi suratlari, Hyundai Tucson’ning esa final sinovlari tasvirlangan video paydo bo‘lgandi.
Izoh (0)