Hyundai Ioniq 5’нинг тақдимотидан бир неча кун ўтиб Европада 236 мингдан ортиқ одам моделга қизиқиш билдирган. Бу ҳақда Жанубий Корея брендининг матбуот хизматига таяниб, Motor хабар берди. Бундан ташқари, чекланган миқдордаги Ioniq 5 Project 45’нинг бутун тиражи буюртмаларни қабул қилиш бошланганидан 24 соат ўтиб, тўлиқ бронланган.
Hyundai’нинг ваъда қилишича, европаликлар электрокарлар учун амалга оширилган олдиндан буюртмаларни узоқ кутмайди — етказиб бериш ишлари 2021 йилнинг иккинчи чорагидан бошланади. Ioniq 5 муваффақияти бир нечта омиллар билан боғланмоқда: биринчидан, янгилик машҳур ихчам кроссоверлар сегментига киради, иккинчидан, у замонавий ретро услубда яратилган ва трансформер-салонга эга, учинчидан, электромобилда 800 волтли қувватланиш функцияси мавжуд.
Ҳозирча электромобилни икки хил модификацияда харид қилиш мумкин: Standart Range ва Long Range — орқа ва тўлиқ узатмали. Моделларнинг двигатели 170-306 от кучини тақдим этишга қодир, бир марта қувватланиш орқали машиналар 480 километр йўл боса олади. Европада энг арзон Ioniq 5 модели 41,9 минг доллардан сотувга чиққан.
Жанубий Кореянинг ўзида ҳам моделга талаб жуда юқори. Бир сутка давомида маҳаллий бозорда рекорд даражадаги олдиндан буюртмалар амалга оширилган: Ioniq 5 учун 23 мингдан ортиқ буюртма расмийлаштирилган. Бу олтинчи авлод Hyundai Grandeur томонидан ўрнатилган рекорддан кўп демак.
Аввалроқ интернетда Hyundai Ioniq 5 серияли электрокроссовери прототипининг янги суратлари, Hyundai Tucson’нинг эса финал синовлари тасвирланган видео пайдо бўлганди.
Изоҳ (0)