Navoiy viloyatining Konimex tumanida sodir bo‘lgan YTHda 58 yoshli tuman obodonlashtirish bo‘limi xodimi vafot etdi. Bu haqda “Daryo”ga viloyat IIB YHXB matbuot guruhi rahbari Farruh Yakubov xabar berdi.
Ta’kidlanishicha, 2021-yilning 27-fevral kuni soat 09:30 da tuman obodonlashtirish bo‘limida ishlovchi bir nechta xodimlar Konimex tumanidan o‘tgan A-379 xalqaro ahamiyatga ega avtomobil yo‘lining chetki qismidan velosipedda harakatlanib kelayotganda Navoiy—Zarafshon yo‘nalishida katta tezlikda harakatlanib kelgan 67 yoshli Tico haydovchisi velosiped boshqarib ketayotgan fuqaroni urib yuborgan.
Avtohalokat oqibatida 58 yoshli jabrlanuvchi voqea joyida vafot etgan. Tico ham yo‘ldan chiqib ketib, beton to‘siqqa urilgan va jiddiy talafot olgan.
“Konimex tuman yo‘llardan foydalanish” unitar korxonasi rahbari Ulug‘bek Rahmatovning bildirishicha, A-379-avtomobil yo‘liga mazkur davlat unitar korxonasi xizmat ko‘rsatadi. Uning ta’kidicha, ushbu yo‘lga yo‘l yotiq chiziqlari chizilgan, nur qaytaruvchi yangi yo‘l belgilari o‘rnatilgan. Yoritish chiroqlari mavjud va yo‘lda avtotransport hodisalariga sabab bo‘ladigan o‘ydim-chuqur kamchiliklar ham yo‘q.
Mazkur holat yuzasidan Konimex tuman IIB tergov bo‘limi tomonidan haydovchi N.X.ga nisbatan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Ayni paytda tergov harakatlari davom etmoqda.
Izoh (0)