Buxoroda ish so‘rab kelgan fuqarodan 300 dollar olgan bog‘cha mudirasiga hukm o‘qildi. Bu haqda “Daryo”ga Jinoyat ishlari bo‘yicha G‘ijduvon tuman sudi sudyasi Boborahim Ochilov ma’lum qildi.
Ma’lum bo‘lishicha, 2019-yilning 15-oktabr kunidan buyon G‘ijduvon tumanidagi 71-sonli maktabgacha ta’lim tashkiloti mudirasi lavozimida ishlab kelgan D.R. o‘z xizmat mavqeyidan foydalangan holda qabuliga ish so‘rab kelgan Gulnoza G‘aybullayevani xo‘jalik mudirasi vazifasiga ishga qabul qilishi evaziga 300 dollar talab qilgan. Buncha miqdordagi mablag‘i bo‘lmagan fuqaro bepul ishga joylashishini uzoq vaqt kutgan. Biroq harakatlari, iltimoslari zoye ketgan.
Shundan so‘ng u 2019-yildan buyon ishga joylasha olmayotgani, maktabgacha ta’lim tashkiloti mudirasi talab qilayotgan 300 dollar miqdoridagi pulni berishga oilaviy sharoiti va imkoniyati yetmasligi yuzasidan huquq-tartibot idoralariga ariza bilan murojaat qilishga majbur bo‘lgan.
2020-yilning 10-dekabr kuni fuqaro Gulnoza G‘aybullayeva bog‘cha mudirasidan telefon orqali o‘tgan yildan buyon taklif qilib kelayotgan ish o‘rni bo‘sh yoki bo‘sh emasligi haqida so‘ragan. Shunda mudira MTTda xo‘jalik ishlari mudirasi lavozimi vakant ekanligi, aytilgan miqdordagi pulni bersa, shu lavozimga uni ishga olishini bildirgan.
Huquq-tartibot idoralari xodimlari tomonidan fuqaro Gulnoza G‘aybullayevaga tadbirda ishlatish uchun maxsus fonddan 300 dollar rasmiylashtirib berilgan. Shu kuni kechga yaqin u mudira bilan tuman markazidagi “Firdavs market” savdo majmuasi oldida uchrashgan.
Fuqaro MTTga ishga kirmoqchi ekanligini bildirganida mudira yana takroran undan kelishilgan pulni talab qilgan. Shundan so‘ng mudiraga maxsus ishlov berilgan 300 dollar berilgan. D.R. pullarni olib, cho‘ntagiga solgan paytda tezkor xodimlar xolislar ishtirokida yetib kelgan va holat rasmiylashtirilgan.
Tergov-surishtiruv jarayonlarida bog‘cha mudirasi o‘z aybiga to‘liq iqror bo‘lgan. Jinoyat ishida mavjud bo‘lgan va sudda o‘z tasdig‘ini topgan barcha dalillar o‘z isbotini topgan.
Jinoyat ishlari bo‘yicha G‘ijduvon tuman sudi mazkur ishni ko‘rib chiqib, mudirani Jinoyat kodeksining 210-moddasi 2-qismining “v” bandi (pora olish) bilan ayblab, unga nisbatan 57-modda (yengilroq jazo tayinlash) qo‘llanilgan.
“Shuningdek, bog‘cha mudirasi 3 yil 6 oy muddatga ozodlikni cheklash jazosini o‘taydi va u soat 20:00 dan soat 07:00 gacha yashash joyidan chiqib ketmaydi. Bundan tashqari, unga nisbatan Jinoyat kodeksining 45-moddasi (muayyan huquqdan mahrum qilish) qo‘llanilib, 2 yil muddatga moddiy javobgarlik va mansabdorlik ishlarda ishlash huquqidan mahrum qilish jazosi ham tayinlandi”, — deydi sudya Boborahim Ochilov.
Mavzuga doir:
Izoh (0)