Toshkent shahrining bozor va savdo komplekslarida undiriladigan yangi yig‘im miqdorlari tasdiqlandi

Toshkent shahar hokimi tomonidan 2021-yil 19-fevraldagi “Toshkent shahridagi bozorlar va savdo komplekslarining ma’muriyati tomonidan undirib olinadigan bir martalik yig‘imlar, ijara to‘lovlari va ko‘rsatiladigan xizmatlar qiymatining yangi miqdorlarini joriy etish to‘g‘risida”gi 203-son qaror imzolandi.

“Mahalliy davlat hokimiyati organlari to‘g‘risida”gi qonunning 25-moddasiga va “Munitsipal aktivlar boshqarmasi markazi” DUK murojaatiga muvofiq quyidagilar tasdiqlangan:

• bozorlar va savdo komplekslarining ma’muriyati tomonidan undirib olinadigan bir martalik yig‘imlar miqdorlari;
• Sergeli avtomobil bozori (“Iste’molda bo‘lgan transport vositalari va ehtiyot qismlar Sergeli bozori” MChJ), “O‘rikzor” savdo kompleksi (“O‘rikzor savdo kompleksi” MChJ) ma’muriyati tomonidan ko‘rsatiladigan xizmatlar qiymati va ijara to‘lovi miqdorlari;
• bozorlar va savdo markazlari ma’muriyatlari tomonidan ko‘rsatiladigan xizmatlar qiymati va inventar ijarasi uchun to‘lov miqdorlari;
• bozorlar va savdo markazlari balansidagi binolar va inshootlardan foydalanganlik uchun ijara to‘lovi miqdorlari;
• bozorlar va savdo komplekslari hududida jamoat obyektlariga xizmat ko‘rsatish va ularni qo‘riqlash bo‘yicha majburiy xizmatlar uchun undiriladigan to‘lov miqdorlari.

Xususan, poytaxt bozorlari va savdo komplekslari ma’muriyati tomonidan undirib olinadigan bir martaliq yig‘imlar miqdoriga ko‘ra, mevalar bilan savdo qiluvchilar kuniga bir o‘rin uchun 10 ming so‘m to‘lashlari kerak (sitrus mevalar bilan savdo qiluvchilar — 22 ming, quruq mevalar uchun — 19 ming). Sabzavotlar bilan savdo qiluvchilar esa kuniga bir o‘rin uchun 7 ming so‘m to‘laydi, issiqxonada yetishtirilgan pomidor va bodring sotuvchilar — 13 ming so‘m.

Bundan tashqari, Sergeli avtomobil bozorida avtotransport vositalarini sotish uchun sotuv hududlaridan haftaninga juma kuni soat 17:00 dan yakshanba kuni soat 17:00 gacha foydalanganligi uchun har bir avtomobildan undiriladigan to‘lov ham tasdiqlangan. Unga ko‘ra, yengil avtomashinalar va mikroavtobuslar uchun usti yopiq sotish joylaridan — 1 donasi uchun 40 ming so‘m; yuk avtomashinalari, avtobuslar, traktorlar va boshqa yuk ko‘taruvchi transport vositalarini sotish joylaridan — 1 donasi uchun 45 ming so‘m.

Avvalroq O‘zbekistonda chakana savdo do‘konlari ijarasi narxi 17 foizga o‘sgani to‘g‘risida xabar berilgandi.